Oralda oqýshylar BUU úlgisinde pikir almasty
ORAL. QazAqparat - Oralda alǵash ret oqýshylar arasynda Birikken Ulttar Uıymy modeli konferentsııasy ótti, dep habarlaıdy QazAqparat tilshisi.
Oraldaǵy Nazarbaev zııatkerlik mektebi uıymdastyrǵan konferentsııanyń maqsaty - álemdik máselelerdi zertteý arqyly oqýshylardyń tanymdyq daǵdysyn damytyp, akademııalyq bilimin tereńdetý, yntymaqtastyq, kelissózder júrgizý qabiletterine, mańyzdy máselelerdi sheshý joldaryn taba bilýge baýlý.
Jıynǵa Aqtóbe qalasyndaǵy Nazarbaev zııatkerlik mektebiniń, sondaı-aq óńirdegi daryndy balalarǵa arnalǵan mamandandyrylǵan S.Seıfýllın atyndaǵy №11 qazaq mektep-ınternat kesheni, daryndy balalarǵa arnalǵan mamandandyrylǵan №8 oblystyq mektep, «Bilim-Innovatsııa» lıtseıi, №7 jalpy orta bilim beretin mektep jáne zııatkerlik bilim oshaǵynyń oqýshylary qatysty.
Konferentsııa barysynda oqýshylar eki topqa bólip, 24 eldiń ókilderi retinde jumys jasady. Olar «Balalamaly energııa kózderi» jáne «Jer betinen joıylyp bara jatqan janýarlardy saqtaý jáne qorǵaý» máselelerin talqylady. Qatysýshylar atalǵan máselelerdi talqylap qana qoımaı, BUU modeliniń formatyna sáıkes ózara seriktestik quryp, múddeles memleketter retinde birigip, máselelerdiń sheshý joldaryn usyndy.
Konferentsııa uıymdastyrýshylarynyń aıtýynsha, bul formattaǵy sharalar oqýshylardyń boıynda qazirgi tańda jastarǵa qajetti daǵdylardy damytady. Oqýshylar roldik oıyn retinde ótetin bul konferentsııa barysynda jahandyq máselelerdi sheshýge óz úlesterin qosýdy kózdeıdi, jumystaný barysynda izdenedi, túrli derekkózdermen jumys jasaıdy.
«Konferentsııa aǵylshyn tilinde ótti. Bul bizdiń mektep jasyndaǵy oqýshylarymyzdyń tildik qabileti, básekelik áleýeti joǵary ekendigin kórsetedi», dedi Oraldaǵy Nazarbaev zııatkerlik mektebiniń baspasóz hatshysy Aqmonshaq Jumaeva.
