Oralda oqýshylar apatty jaǵdaıdaǵy mektepte bilim alyp jatyr
ORAL. QazAqparat – Oralda oqýshylar apatty jaǵdaıdaǵy №31 orta mektepte bilim alyp jatyr, dep habarlaıdy QazAqparat tilshisi.
Atalmysh mektep dırektory Amanjol Haırovtyń aıtýynsha, 380 orynǵa eseptelgen ǵımarat 1961 jyly salynǵannan beri kúrdeli jóndeý kórmegen.
Tehnıkalyq saraptamaǵa sáıkes ótken jyly apatty jaǵdaıda dep tanylǵan mektepte qazirgi tańda 410 oqýshy eki aýysymda bilim alýda.
«Mekteptiń akt zaly, ashanasy joq. Túrli sharalar dálizde ótedi. Bastaýysh synyp oqýshylary men az qamtylǵan otbasy balalaryna ystyq tamaq kúnine eki mezgil ákelinip, beriledi. Sport zaly jartylaı jertólede oryn tepken. Oqý kabınetteri jetispeıdi. Qanshama jamap-jasqaǵanmen, keıbir qabyrǵalardyń qabyrshaqtanyp, jarylyp turǵanyn kórýge bolady», deıdi mektep basshysy.
Bıylǵy 24 qazan kúni hımııa kabınetinde tóbeden sylaq qulap túsken. Abyroı bolǵanda, oqýshylar aldyńǵy jaqta otyrǵandyqtan, eshkimniń ústine qulamaǵan. Tóbe sol boıda qaıta sylanǵanymen, mundaı jaǵdaıdyń qaıtalanbasyna kepildik berý qıyn ekendigi belgili.
Qalanyń bul aýdanynda bolashaqta halyq kóbeımese, azaımaıdy. Jýyrda toǵyz qabatty eki úı paıdalanýǵa berilmek. Sh.Aıtalıev atyndaǵy kóshede úsh birdeı bes qabatty úıge turǵyndar qonystanyp úlgerdi. Sondyqtan mektepte oqýshylardyń sany azaımasy anyq.
Munda apatty ǵımaratty buzyp, ornyna 400 oryndyq mektep salý kózdelgen. Buzý jáne salý jumystary kezinde oqýshylar №32, №34 jáne №23 mektepterde bólinip, bilim almaqshy.
Mektep dırektory aldaǵy jyly qarjy bólinip, qurylys bastalsa eken deıdi.
Oblystyq bilim basqarmasy memlekettik baǵdarlamalardy júzege asyrý jáne kúrdeli shyǵystar bóliminiń basshysy Aıajan Júnisova jobalyq-smetalyq qujattamanyń memlekettik saraptamadan ótip jatqandyǵyn jetkizdi.
Qalada apatty jaǵdaıdaǵy mektep bir bul ǵana emes. №33 mektepte oqıtyn 401 bala kúni búgin №2 mektepte bilim alýda. Eski ǵımarattyń ornyna 300 oryndyq jańa mektepti salýdyń jobalyq-smetalyq qujattamasy (JSQ) jasalyp, memsaraptamadan ótken. Alaıda QR Bilim jáne ǵylym mınıstrligine jiberilgen bıýdjettik ótinim qoldaý tappaǵan.
Oblystyq daryndy balalarǵa arnalǵan mamandandyrylǵan №8 mekteptiń 483 oqýshysy qazirgi tańda №37 orta mektepte bilim alýda. Bul mekteptiń jańa ǵımaratyn salý úshin jobalyq-smetalyq qujattama jasaýǵa bıýdjettik ótinim joldanǵan.
Oblystyq qurylys basqarmasy basshysynyń orynbasary Tımýr Shynııazovtyń naqtylaýynsha, №31 mektep ǵımaratynyń JSQ-sy memsaraptamadan ótkennen keıin aldaǵy jyly qarjylandyrý máselesi qaralatyn bolady. Quny 1,3 mlrd teńge bolatyn №33 mektep ǵımaratyna 2020 jyly áýeli 230 mln teńge bólinip, qurylysy bastalmaqshy. Al №8 mekteptiń JSQ-syn jasaqtaýǵa ázirge qarjy bólinbegen.
Óńirde barlyǵy 2510 oqýshy bilim alatyn segiz mektep (atalǵandardan basqa Qaztalov aýdanynda Qaztalov aýylynda A.Orazbaeva atyndaǵy orta mektep, Saryqudyq mektebi, Juldyz aýylynda A.Qusaıynov atyndaǵy mektep, Aqjaıyq aýdanynda Atameken eldi mekeninde M.Ótemisov atyndaǵy mektep, Chapaev aýylyndaǵy Abaı atyndaǵy mektep-gımnazııa) apatty jaǵdaıda dep tanylǵan. Bulardyń ornyna 2276 oryndyq segiz mektep salý oılastyrylǵan. Osynyń ishinde Chapaev aýylynda 100 oryndyq ınternatymen 300 oryndyq mektep qurylysyn bastaýǵa bıyl respýblıkalyq bıýdjetten 1 mlrd teńge bólingen bolatyn. Qazir qurylysy júrip jatqan mektep ǵımaratyn aldaǵy jyly 1 qyrkúıekte berý kózdelýde.
Taǵy bir túıtkildi másele – oblysta úsh aýysymda oqıtyn mektepterdiń azaımaı otyrǵany. Oralda №47, №10, №20, №18, estetıkalyq baǵyttaǵy gımnazııada jáne Terekti aýdany Podstepnyı qazaq mektebinde 9486 oqýshy bar. Bul máseleni sheshý úshin 4 myń oryndyq alty mektep salý qajet. Sonyń ishinde ázirge qalada №51 mektep ǵımaratyna el qazynasynan 1 mlrd teńge qaralyp, qurylysy bastaldy.
Oblys ortalyǵyna qonys aýdarýshylardyń kóbeıýine jáne jańadan shaǵynaýdandardyń boı kóterýine baılanysty keıingi jyldary salynǵan mektepterdiń ózine balalar syımaı jatyr. Mysaly, Zachagan kentindegi №47 orta mektep dırektory Natalıa Erǵojıevanyń málim etkenindeı, 1200 oryndyq bilim oshaǵyna kelgender sany 2889-ǵa jetken. Munyń 100-i shaǵyn ortalyqta tárbıelenip, 238-i mektep aldy daıarlyqta bolsa, qalǵan 2551-i – mektep oqýshylary.
Mektepterdiń tarlyǵy, balalardyń shamadan tys artýy qolaısyzdyq týdyrýmen qatar bilim sapasyna da áser etetini anyq.
BQO taýarlar men kórsetiletin qyzmetterdiń sapasy men qaýipsizdigin baqylaý departamentinen alynǵan málimetke qaraǵanda, qalalyq basqarma bıyl shahardaǵy mektepterdi teksergen kezde 16 bilim oshaǵynda synyptarda balalardyń qalyptaǵydan artyp ketkenin anyqtady. Aıtalyq, synyptarda balanyń sany 25-ten aspaýy kerek bolsa, orta eseppen 28 oqýshy bilim alǵan. Mektep dırektorlaryna aıyppul salynbaǵanymen, osy kemshilikti alty aı ishinde joıý jóninde uıǵarym berildi. Oblystyq bilim basqarmasy basshysynyń orynbasary Záýre Ǵumarova olarǵa sanıtarlyq talaptardy saqtaý kerektigi eskertiletindigin aıtty.
