Oralda oqýshy bala menıngoentsefalıtke shaldyqty
ORAL. QazAqparat – Oralda oqýshy bala vırýsty menıngoentsefalıtke shaldyqty, dep habarlaıdy QazAqparat tilshisi.
Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń aıtýynsha, 10 jasar er balaǵa vırýsty menıngoentsefalıt dıagnozy qoıyldy.
Bala 19 qarasha kúni aýyrǵanymen, eki kúnnen keıin jedel járdem shaqyryldy. Aldymen oblystyq kópbeıindi balalar aýrýhanasyna jatqyzyldy. Bir kúnnen soń oblystyq juqpaly aýrýlar aýrýhanasyna aýystyryldy. Bólimshede jatqan balanyń jaǵdaıy ortasha.
BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń bas mamany Juldyz Kárimovanyń sózine qaraǵanda, menıngıttiń úsh túri (vırýsty, bakterıaldy jáne irińdi) bar. Sonyń ishinde vırýsty menıngıt jeńilirek, asqynýlarsyz ótedi.
Atalǵan bala Valdorf mektep-gımnazııasynyń 3-synybynda oqıdy, qazir jaǵdaıy jaqsy deýge bolady.
Bıyl osymen menıngıtpen barlyǵy alty adam aýyrsa, sonyń úsheýi – balalar.
Bul aýrý jemis-jıdekti jýmaý (las qoldar), aýa-tamshy joldary, sondaı-aq «deni saý» vırýs tasymaldaýshy adamdar arqyly taralady.
«Menıngıt kúz-qys aılarynda órshı túsýi múmkin. Sondyqtan adamdar kóp jınalatyn jerge barýdy shekteý, aýa raıyna qaraı kıiný jáne ımmýnıtetti kóterý kerek. Aýrý belgileri (bastyń qatty aýyrýy, qusý, ishtiń ótýi, dene qyzýynyń kóterilýi) baıqala qalǵan jaǵdaıda birden dárigerge qaralý qajet», dedi QazAqparat tilshisine J.Kárimova.
