Oralda oq jaraqatyn alǵan polıtsııa qyzmetkeri jansaqtaý bóliminde jatyr

ORAL. KAZINFORM – BQO polıtsııa departamentinde oq jaraqatyn alǵan polıtsııa qyzmetkeri jansaqtaý bólimine tústi.

BQO polıtsııa departamentiniń baspasóz qyzmetinen málim etkenindeı, qazirgi kezde oqıǵanyń mán-jaıy anyqtalyp jatyr. 

Departament málimetine qaraǵanda, polıtsııa qyzmetkeri jansaqtaý bóliminde. QR Qylmystyq is júrgizý kodeksiniń 201-babyna sáıkes ózge aqparat jarııalaýǵa jatpaıdy.

BQO densaýlyq saqtaý basqarmasy baspasóz qyzmetiniń naqtylaýynsha, búgin saǵat 07.41-de Pýgachev kóshesi 45-mekenjaıda ornalasqan polıtsııa departamentiniń baqylaý pýnkti ǵımaratynda oq jaraqatyn alǵan adamnan qan ketip jatqany jóninde shaqyrtý túsken. 

«Jedel medıtsınalyq járdem brıgadasy 2003 jylǵy jigitti oblystyq kópbeıindi aýrýhanaǵa jetkizdi. Naýqasqa shuǵyl túrde ota jasaldy. Qazirgi ýaqytta jansaqtaý bóliminde jatyr. Jaǵdaıy óte aýyr», - dep habarlady vedomstvodan.

Eske sala keteıik, budan buryn BQO-da 4 adam qaza tapqan jol oqıǵasynan keıin eki adamnyń sanavıatsııamen Oralǵa jetkizilgenin jazǵan bolatynbyz.