Oralda ógeı ákesin óltirgen jasóspirim ızolıatorda ózine qol jumsady
ORAL. QazAqparat – Oralda ógeı ákesin óltirgen jasóspirim qyz tergeý ızolıatorynda asylyp qaldy, dep habarlaıdy QazAqparat tilshisi.
BQO qylmystyq-atqarý júıesi departamentiniń baspasóz qyzmetinen túsken málimetke qaraǵanda, oqıǵa 8 mamyr kúni oryn aldy.
Shamamen saǵat 15.30-da tergeý ızolıatorynyń qyzmetkerleri kameradan Irına Lapınanyń múrdesin tapty.
Marqum kolgotkıiniń bir ushyn tereze toryna, ekinshi jaǵyn moınyna baılap, asylyp qalǵan. Sońyna jazba qaldyrmaǵan.
Oqıǵa ornyna jedel járdem brıgadasy, Oral qalasy polıtsııa basqarmasynyń jedel tergeý toby, prokýratýra ókili, sondaı-aq «Adam quqyǵy jáne zańdylyqty saqtaý jónindegi qazaqstandyq halyqaralyq bıýro» qoǵamdyq birlestigi Batys Qazaqstan fılıalynyń basshysy shaqyryldy.
Qaraý kezinde qyzdyń denesine zaqym kelmegeni anyqtaldy. Asylyp ólgen marqumnyń múrdesi týysqandaryna tapsyryldy.
«Qazirgi kezde Oral qalasy polıtsııa basqarmasy osy derek boıynsha sotqa deıingi tergeý amaldaryn júrgizýde. QR Qylmystyq protsess júrgizý kodeksiniń 201-babyna sáıkes tergeý derekteri jarııalaýǵa jatpaıdy», delingen habarlamada.
Eske sala keteıik, budan buryn Oralda ógeı ákesin óltirgen 17 jastaǵy jasóspirim qyz ben onyń dosy sottalǵanyn jazǵan bolatynbyz.
