Oralda oblystyq balalar aýrýhanasynyń 40 jyldyǵy atalyp ótti
ORAL. QazAqparat - 25 juldyzdy kún aıasynda Oralda Batys Qazaqstan oblystyq kópbeıindi balalar aýrýhanasynyń 40 jyldyǵyna oraı pedıatrııa men balalar hırýrgııasy máselelerine arnalǵan aımaqtyq ǵylymı-tájirıbelik konferentsııa ótip, murajaı ashyldy, dep habarlaıdy QazAqparat tilshisi.
Sharaǵa qatysqan oblys ákiminiń orynbasary Marat Toqjanovtyń atap ótkenindeı, táýelsizdik jyldary medıtsına salasynda kóptegen tabystarǵa qol jetip, emdeý mekemeleriniń ǵımarattary jańadan salyndy. Sonyń biri - oblystyq kópbeıindi balalar aýrýhanasy. Osy zamanǵy talaptarǵa saı keletin ǵımaratta oryn tepken, qajetti medıtsınalyq qural-jabdyqtarmen jasaqtalǵan balalar aýrýhanasynyń qyryq jyl ishinde júrip ótken jolyn endi murajaıdan da kórýge bolady. Meımandarǵa aýrýhana tarıhy men ujymnyń tynys-tirshiligi týraly fılm kórsetildi.
Konferentsııada Aqtóbeden arnaıy kelgen Marat Ospanov atyndaǵy Batys Qazaqstan memlekettik medıtsına ýnıversıtetiniń balalar hırýrgııasy jáne pedıatrııa kafedrasynyń professorlary Bolat Jıenalıev, Jumabek Dosymov, sondaı-aq BQO densaýlyq saqtaý basqarmasynyń basshysy Qamıdolla Irmenov jáne basqalar balalardy emdeýge qatysty óz oı-pikirlerimen, tájirıbelerimen bólisti.
Jıynda málim etilgenindeı, óńirde medıtsına salasyna ozyq tehnologııalar engizilip, adamdardy, sonyń ishinde balalardy emdeýdiń sony ádisteri qoldanylýda.
Shara barysynda ozat qyzmetkerler gramota, alǵyshattarmen marapattaldy.
Aıta keteıik, budan qyryq jyl buryn aýrýhana ashylǵan mezette onda 7-8 dáriger eńbek etse, qazirgi kezde olardyń sany 58-ge jetken. Bıyldyń ózinde úsh jas pedıatr kelip, óz qyzmetin atqarýda.
