Oralda nelikten adam basyna 10 jumyrtqadan ǵana satylyp jatyr

ORAL. KAZINFORM — Oral qalasyndaǵy áleýmettik dúkenderde jumyrtqa bir qolǵa 10 danadan satylyp jatyrǵany jóninde málimettiń taraýyna baılanysty BQO aýyl sharýashylyǵy basqarmasy mehanızatsııa jáne qaıta óńdeý bóliminiń basshysy Berik Sıtqazıev túsinik berdi.

Mamannyń aıtýynsha, turaqtandyrý qorynyń jumyrtqasy jańajyldyq mereke kezinde 20 jeltoqsannan 31 jeltoqsanǵa deıin bir qolǵa 10 danadan satylǵan.

1 qańtardan bastap bul shekteý alynyp, qazir bir qolǵa 30 dana jumyrtqadan satylýda.

«Baǵany turaqtandyrý maqsatynda ótken jyly maýsymda jergilikti taýar óndirýshi — „Agrofırma „Aqas“ JShS-ǵa „aınalym shemasy“ tetigi aıasynda 3,8 mln dana taýyq jumyrtqasyn jetkizýge 160 mln teńge kóleminde zaım berilgen. Muny 2023 jyldyń qazany men 2024 jyldyń mamyry arasynda júzege asyrý kózdelgen. Qazan aıynan beri taýyq jumyrtqasy 50 saýda núktesine ár danasyn 43 teńgeden ákelinýde. Saýda oryndary oǵan 10 paıyz saýda ústeme qosyp, 10 danasyn 473 teńgeden satýda. Jumyrtqanyń kóterme saýdasyna jol bermeý úshin bir qolǵa 30 danadan satýǵa shekteý qoıyldy. „Agrofırma „Aqas“ JShS kelisimshartqa sáıkes kúni búginge deıin 1,8 mln astam dana taýyq jumyrtqasyn ótkizdi. Jumyrtqany tómen baǵamen satý bıylǵy jyldyń mamyryna deıin jalǵasady», — dedi B.Sıtqazıev.

Eske sala keteıik, budan buryn BQO-da jumyrtqa bir adamǵa 10 danadan satylyp jatqanyn jazǵan bolatynbyz.