Oralda Naýryz merekesine 50 myńnan astam adam jınaldy
ORAL. KAZINFORM – 22 naýryz kúni Oral qalasynda kóktemniń basty merekesi – Naýryz keń kólemde toılandy. Ortalyq alańdarǵa jınalǵan turǵyndar men qala qonaqtary úshin kıiz úıler tigilip, jármeńkeler men kontserttik alańdar uıymdastyryldy.
Uıymdastyrýshylardyń málimetinshe, merekelik sharalarǵa 50 myńnan astam adam qatysty.
Qala turǵyndary ulttyq taǵamdardan dám tatyp, qolóner týyndylarymen tanysyp, teatrlandyrylǵan qoıylymdar men kontserttik baǵdarlamalardy tamashalady. Halyqtyq birliktiń kórinisin ulttyq oıyndar, altybaqan jáne kópshilik serýender aıshyqtaı tústi.
Turǵyndar merekeniń erekshe mańyzyn atap ótti.
– Naýryz – bul jaı ǵana mereke emes, bul bizdiń tamyrymyz ben tarıhymyz. Búgin balalarymyzdy ertip kelip, dástúrimizdi kórsetkimiz keldi. Osyndaı kúnder kóp bolsa eken, - deıdi qala turǵyny Aıgúl Sarıeva.
Zeınetker Qanat Orazov merekeniń joǵary deńgeıde uıymdastyrylǵanyn aıtty.
– Uıymdastyrý deńgeıi joǵary. Eń bastysy – halyqtyń birligi men kóterińki kóńil-kúıi. Ásirese ulttyq qundylyqtar men salt-dástúrdiń jas urpaqqa jetkizilip jatqany mańyzdy, - dedi Q. Orazov.
Saltanatty is-shara barysynda oblys ákimi turǵyndardy quttyqtap, Naýryzdyń birlik pen kelisimniń, urpaqtar sabaqtastyǵynyń sımvoly ekenin atap ótti.
Sonymen qatar mereke qarsańynda 43 otbasynyń jańa baspanaǵa ıe bolǵanyn aıtyp, óńirdegi áleýmettik qoldaý sharalaryna toqtaldy. Budan bólek, aımaqtyń damýyndaǵy oń ózgerister men ınvestıtsııalyq belsendiliktiń artqany da tilge tıek etildi.
Sondaı-aq Memleket basshysy Qasym-Jomart Toqaev bastamasymen júzege asqan «Naýryznama» onkúndigine erekshe nazar aýdaryldy. Onyń aıasynda Otbasy kúninde uzaq jyl birge ómir súrgen juptar qurmettelip, otbasy qundylyqtary nasıhattaldy. Ulttyq sport kúninde «Babalar izimen» lıgasynyń jańa maýsymy bastalyp, dástúrli oıyndar zamanaýı tehnologııalarmen ushtastyryldy. Kún saıyn teatrlandyrylǵan qoıylymdar, qoldanbaly óner kórmeleri uıymdastyrylyp, «Digital Nauryz» aıasynda tsıfrlandyrý elementteri engizildi.
Aldaǵy ýaqytta «Taza Qazaqstan» ekologııalyq aktsııasy aıasynda senbilikter ótkizilip, kógaldandyrý jumystary jalǵasyn tabady.