Oralda nan qymbattady

ORAL. QazAqparat – Oral qalasynda nan baǵasy qymbattady, dep habarlaıdy QazAqparat tilshisi.

Qazirgi kezde qala dúkenderinde joǵary surypty nan bólkesiniń baǵasy 119 teńgege jetti.

Bólkeniń 19 teńgege qymbattaýy astyq baǵasynyń joǵarylaýyna baılanysty bolyp otyr.

Oral qalasy ákimdiginen túsken málimetke qaraǵanda, birinshi surypty unnan pisirilgen nan baǵasy ózgerissiz qaldy. Mundaı bólkeniń baǵasy – 80 teńge.

Birinshi surypty nan QR Úkimeti 2010 jylǵy 1 naýryzdaǵy №145 qaýlysymen bekitilgen áleýmettik mańyzy bar azyq-túlik taýarlarynyń tizimine engizilgen. Memleket QR Kásipkerlik kodeksi 116-baby 3-bóligi 1-tarmaqshasyna sáıkes osy tizimge engizilgen 19 taǵam túriniń baǵasyn retteıdi. Sondyqtan birinshi surypty nan baǵasynyń kóterilýi kútilip otyrǵan joq.

Joǵary surypty nan baǵasy oblys ortalyǵynan shalǵaı ornalasqan aýdandardyń biri – Bókeı ordasynda da ósti. Turǵyndardyń sózine qaraǵanda, munda aq nannyń quny buryn - 140 teńge bolsa, qazirgi tańda - 160 teńge, keı dúkenderde - 170 teńgeden satylýda.