Oralda myńǵa jýyq adam qysqa merzimdi kásiptik oqýmen qamtylmaq
ORAL. QazAqparat - Oral qalasynda Nátıjeli jumyspen qamtýdy jáne jappaı kásipkerliketi damytýdyń 2017-2021 jyldarǵa arnalǵan baǵdarlamasy aıasynda tıisti jumystar atqarylýda, dep habarlaıdy «QazAqparat» tilshisi.
Oral qalasy halyqty jumyspen qamtý ortalyǵy dırektorynyń mindetin atqarýshy Nursáýle Eleýovanyń aıtýynsha, atalmysh baǵdarlama úsh baǵyt boıynsha júzege asyrylýda. Atap aıtqanda, baǵdarlamaǵa qatysýshylardy tehnıkalyq, kásiptik bilimmen jáne qysqa merzimdi kásiptik oqýmen qamtamasyz etý; jappaı kásipkerlikti damytý; halyqty jumyspen qamtýǵa járdemdesý jáne eńbek resýrstarynyń utqyrlyǵy arqyly eńbek naryǵyn damytý.
Bıyl Oral qalasy boıynsha baǵdarlamany júzege asyrýǵa respýblıkalyq bıýdjetten 30 407 myń teńge jáne qosymsha oblystyq qazynadan 200 211 myń teńge bólindi. Sonyń ishinde áleýmettik jumys oryndaryn uıymdastyrýǵa 8 450 myń teńge, jastar tájirıbesin uıymdastyrýǵa 90 027 myń teńge, oqý kýrstaryn uıymdastyrýǵa 132 141 myń teńge qaraldy.
«Baǵdarlamaǵa qatysýshylardy tehnıkalyq, kásiptik bilimmen jáne qysqa merzimdi kásiptik oqýmen qamtamasyz etý» 1-baǵytyna sáıkes tehnıkalyq jáne kásiptik bilim berý boıynsha 400 jas azamat tegin oqytýǵa joldanady. Olardy bıylǵy 1 qyrkúıekten bastap oqytý josparlanýda. Ol jumystardy uıymdastyrý úshin oblystyq bilim basqarmasymen mobıldik top qurylyp, joǵary oqý oryndaryna túspeı qalǵan mektep túlekteri arasynan oqýǵa nıet bildirgenderdiń tizimi jasalýda. Oqý baǵdarlama qatysýshylary úshin tegin, aı saıyn shákirtaqy tólenedi jáne bir márte ystyq tamaqpen qamtylady. Oqýdy bitirgennen keıin jumyspen qamtý ortalyqtaryna júginip, jumysqa ornalastyrý sharalaryna qatysý mindetteledi.
Eńbek naryǵynda suranysqa ıe kásipter men daǵdylar boıynsha 976 adamdy qysqa merzimdi kásiptik oqytýmen qamtý kózdelýde. Bul maqsatqa memleket qazynasynan (jyl basynan 21 058 myń teńge jáne qosymsha respýblıkalyq bıýdjetten 113 624 myń teńge) barlyǵy 134 682 myń teńge qarastyryldy. Bıylǵy birinshi jartyjyldyqta 120 adam VS jáne DE sanattary boıynsha júrgizýshi, baqylaýshy-kassır, shashtaraz, kásibı aǵylshyn tili kýrsy, tiginshi jáne pishýshi, elektr jáne gazben dánekerleýshi sekildi mamandyqtar boıynsha qysqa merzimdi kásiptik oqýmen qamtyldy. Bul kýrstardyń oqý merzimi 1 aıdan 6 aıǵa deıin. Oǵan jumyssyzdar men ózin-ózi jumyspen qamtyǵandar qatysa alady. Barlyq nıet bildirýshiler jumyspen qamtý ortalyǵyna jolyǵady. Oqý tegin jáne aı saıyn baǵdarlama esebinen shákirtaqy (16 759 teńge) tólenedi.
Baǵdarlamanyń «Jappaı kásipkerlikti damytý» 2-baǵyty boıynsha bıyl 76 adamǵa shaǵyn nesıe jáne nesıe berý úshin baǵdarlama tarapynan 294 730 myń teńge nesıe qarajatyn bólý josparlanǵan bolatyn. Kúni búgin halyqty jumyspen qamtý ortalyǵyna 237 adam nesıe alýǵa tilek bildirip, mamandardan túrli keńester aldy. 163 adam «Atameken» Ulttyq kásipkerler palatasy qalalyq fılıalyna kásipkerlik negizderin oqý kýrsynan ótýge jiberildi. Qazirgi tańda 42 adam oqý kýrsyn támamdap, sertıfıkat aldy. Degenmen nesıe berý jumysy ekinshi deńgeıli bankterdiń anyqtalmaýyna baılanysty kesheýildeýde.
Bıylǵy alty aıda jumyspen qamtýǵa járdemdesý baǵytynda halyqty jumyspen qamtý ortalyǵyna 4 689 adam jolyǵyp, onyń 1 704-i jumyssyz retinde tirkeldi, 2 929 adam memlekettik qoldaý sharalarymen qamtyldy. Sonyń ishinde 1 553 adam turaqty jumys oryndaryna, 42-si memlekettik jáne salalyq baǵdarlamalar aıasynda ashylǵan jumys oryndaryna, 335-i jastar tájirıbesine, 63-i áleýmettik jumys oryndaryna, 120-sy qysqa merzimdi oqý kýrstaryna, 816 adam qoǵamdyq jumystarǵa joldandy.
«Elbasy tapsyrmasyna sáıkes qolǵa alynǵan Nátıjeli jumyspen qamtýdy jáne jappaı kásipkerliketi damytýdyń 2017-2021 jyldarǵa arnalǵan baǵdarlamasy aıasynda josparlanǵan jumystar budan bylaı da jalǵasatyn bolady», dedi N.Eleýova.
