Oralda muzdatylǵan et ónimderin «jalǵan» sertıfıkattaý faktisi áshkerelendi
ASTANA. KAZINFORM - Tehnıkalyq retteý jáne metrologııa Komıtetiniń Batys Qazaqstan oblysy boıynsha Departamenti sanıtarlyq-epıdemıologııalyq baqylaý organdarymen ózara is-qımyly nátıjesinde tamaq ónimderin «jalǵan» sertıfıkattaý faktisi anyqtaldy.
Tıisti jumysty júrgizýge muzdatylǵan et quramdy jartylaı fabrıkattardy baqylaý maqsatynda satyp alý nátıjeleri boıynsha kelip túsken materıaldar negiz boldy. Ónim Belarýs Respýblıkasynyń sertıfıkattaý organynda resimdelgen EAEO sáıkestik týraly deklaratsııasymen birge ótkizilgen.
Sáıkestikti baǵalaý materıaldaryn zerdeleý barysynda deklaratsııa Almaty qalasyndaǵy akkredıttelgen synaq zerthanasy bergen dep kórsetilgen synaq hattamasynyń negizinde qabyldanǵany anyqtaldy.
Qujattyń túpnusqalyǵyn tekserý maqsatynda departament atalǵan zerthanaǵa resmı suraý joldady. Alynǵan jaýapqa sáıkes, bul ónimge synaqtar zerthanada júrgizilmegen, al tıisti synaq hattamasy resimdelmegen jáne berilmegen.
Osylaısha, sáıkestik týraly deklaratsııa ónimge synaqtardyń naqty júrgizilgenin jáne onyń Eýrazııalyq ekonomıkalyq odaqtyń tehnıkalyq reglamentteriniń mindetti talaptaryna sáıkestigin rastamaıtyn anyq emes dáleldemelik materıal negizinde tirkelgen.
Materıaldardy qaraý nátıjeleri boıynsha sáıkestik týraly deklaratsııanyń Qazaqstan Respýblıkasynyń aýmaǵyndaǵy qoldanysyn joıý týraly sheshim qabyldandy. Aqparat ýákiletti organǵa jáne tehnıkalyq retteý salasynda baqylaý men qadaǵalaýdy júzege asyratyn memlekettik organdarǵa joldandy.
Sáıkestikti rastaý jáne baǵalaý rásimderin júrgizý qaǵıdalaryn buzǵany úshin ónim óndirýshi ákimshilik jaýapkershilikke tartyldy.
Aıta ketelik Qazaqstan 1,1 myńnan astam jalǵan sertıfıkattyń kúshin joıǵan edi.
