Oralda munaı ónimderin zańsyz tasymaldaǵandarǵa qatysty sot úkimi shyqty
ORAL. QazAqparat - Búgin BQO qylmystyq ister jónindegi mamandandyrylǵan aýdanaralyq sotta munaı ónimderin zańsyz tasymaldaǵandarǵa qatysty úkim shyqty, dep habarlaıdy QazAqparat tilshisi.
Atalmysh sottan túsken málimetke qaraǵanda, aıyptalýshylar 2014 jylǵy maýsymnyń sońy men 2017 jyldyń 5 qyrkúıegine deıin qoǵamdyq qaýipsizdik pen tártipke, menshikke qaıshy keletin is-áreketterge baryp, ekonomıkalyq qyzmet salasynda qylmys jasaǵan.
Qaırat Namazbaev tranulttyq uıymdasqan top quryp, oǵan Jandos Qaıyrbaev, Tımýr Qalıev, Aıbek Balturmanov, Nurlan Kenjenov qatysqan.
Olar munaı jáne munaı ónimderin asa iri kólemde zańdylyǵyn kórsetetin qujatsyz tasymaldaǵan, satyp alyp, ótkizgen.
Sondaı-aq deklaratsııalar men qujattarǵa kirister men shyǵystar týraly kórineý burmalanǵan málimetterdi engize otyryp, jumystyń naqty oryndalǵany, qyzmet kórsetý, taýar jóneltilgeni jazylmaǵan shot-faktýralardy paıdalaný arqyly iri kólemde salyq jáne basqa bıýdjetke mindetti tólemder tóleýden jaltarǵan.
Sot úkimimen Q.Namazbaev QR QK 197-baby 4-bóligi 1 jáne 2-tarmaǵy (munaıdyń jáne munaı ónimderiniń shyǵarylý zańdylyǵyn rastaıtyn qujattarsyz olardy tasymaldaý, ıemdený, ótkizý, saqtaý, sondaı-aq munaıdy qaıta óńdeý), 218-baby 3-bóligi 2 jáne 3-tarmaǵy (qylmystyq jolmen alynǵan aqshany jáne (nemese) ózge múlikti zańdastyrý (jylystatý), 28-baby 3-bóligi, 244-baby (azamattyń salyq jáne (nemese) bıýdjetke tólenetin basqa da mindetti tólemderdi tóleýden jaltarýy), 245-baby 3-bóligi (uıymdarǵa salynatyn salyqty jáne (nemese) bıýdjetke tólenetin basqa da mindetti tólemderdi tóleýden jaltarý), 264-baby 1-bóligine (transulttyq uıymdasqan top, transulttyq qylmystyq uıym qurý jáne olarǵa basshylyq etý, sol sııaqty olarǵa qatysý) sáıkes aıypty dep tanyldy. Ol 10 jylǵa bas bostandyǵynan aıyrý jazasyn qaýipsizdigi joǵary qylmystyq-atqarý júıesi mekemesinde óteýge sottaldy.
Al J.Qaıyrbaev, T.Qalıev, A.Balturmanov jáne N.Kenjenovke segiz jylǵa bas bostandyǵynan aıyrý jazasyn qaýipsizdigi orta qylmystyq-atqarý júıesi mekemesinde óteý kesildi.
Oǵan qosa is júzinde jumystary oryndalmaǵan, qyzmetteri kórsetilmegen, taýarlary jóneltilmegen shot-faktýralar jazýǵa barǵan Baqytjan Jaqataev bes jylǵa bas bostandyǵynan aıyrý jazasyn qaýipsizdigi orta qylmystyq-atqarý júıesi mekemesinde óteýge sottaldy.
Sot úkimi zańdy kúshine engen joq.
