Oralda munaı-gaz mashına jasaý forýmy ótti
ORAL. KAZINFORM - «Atameken» óner ordasynda Munaı-gaz mashına jasaý forýmy jáne Operatorlardyń ashyq esik kúni ótti. Іs-sharany QR Energetıka mınıstrligi jáne oblys ákimdiginiń qoldaýymen Munaı-gaz mashına jasaýyn damytý halyqaralyq ortalyǵy uıymdastyrdy.
Forým qatysýshylary aldymen 40-qa jýyq otandyq kásiporynnyń kórmesin aralap, munaı-gaz salasyna arnalǵan ónimdermen tanysty.
Plenarlyq otyrysta Quryltaı depýtaty Erik Qojanııazov, Energetıka vıtse-mınıstri Erlan Aqbarov jáne oblys ákimi apparatynyń basshysy Nurdildá Oraz quttyqtaý sóz sóıledi.
Oblys ákimi apparatynyń basshysy Nurdildá Oraz aımaq basshysy Narıman Tóreǵalıevtiń quttyqtaýyn jetkizip, bul forým Prezıdent tapsyrmasyna sáıkes iri operatorlardyń suranysyn otandyq kásiporyndardyń óndiristik áleýetimen ushtastyryp, ózara tıimdi kelisimderge qol jetkizetin iskerlik alań ekenin atap ótti.
- Bizdiń maqsatymyz – ınvestıtsııa kólemin arttyrý ǵana emes, onyń óńir ekonomıkasyna beretin naqty qaıtarymyn qamtamasyz etý. Іri jobalar jergilikti kásiporyndardyń damýyna, óndiristik qýattardyń artýyna jáne jańa jumys oryndarynyń ashylýyna qyzmet etýi tıis. Bul – Prezıdent júktegen naqty mindetter, – dedi Nurdildá Oraz.
Forýmda «QazMunaıGaz» UK» AQ ókili Shafkat Qudabaev, «Teńizshevroıl» JShS basshysy Ýılıam Lakobı, NCOC ókili Jandos Orazalıev, KPO b.v. basshysy Marko Marsılı, IMBC bas dırektory Dastan Ábishev jáne KMG PetroChem basshysy Dıaz Dııanov baıandama jasady.
Іs-shara aıasynda «QazMunaıGaz» UK» AQ, iri operatorlar men otandyq óndirýshiler arasynda jalpy quny 700 mln AQSh dollaryna jýyq kelisimsharttarǵa qol qoıyldy. Bul ótken jylǵy kórsetkishten 240 mln dollarǵa artyq.
800-den astam qatysýshy jınalǵan forýmda óndiristi jergiliktendirý, satyp alý talaptary men halyqaralyq standarttar talqylanyp, B2B kezdesýler uıymdastyryldy.
