Oralda munaı-gaz isinen respýblıkalyq olımpıada jeńimpazdary anyqtaldy
ORAL. QazAqparat - Jáńgir han atyndaǵy Batys Qazaqstan agrarlyq-tehnıkalyq ýnıversıtetinde JOO stýdentteri arasynda munaı-gaz isi mamandyǵy boıynsha respýblıkalyq ІH pándik olımpıada márege jetti, dep habarlaıdy «QazAqparat» tilshisi.
Eki kúnge sozylǵan bilim báıgesine elimizdegi on joǵary oqý ornynan 9 jetekshisimen 25 stýdent qatysyp, baq synady. Olımpıadanyń birinshi kezeńinde olar kompıýterlik testiden ótse, ekinshisinde jazbasha synaq tapsyrdy.
Saıys qorytyndysynda Qorqyt ata atyndaǵy Qyzylorda memlekettik ýnıversıtetiniń stýdenti Baqytbek Dáýrenbekuly (qazaq bólimi) jeńimpaz atandy. Sondaı-aq M.H.Dýlatı atyndaǵy Taraz memlekettik ýnıversıtetinen Vladıslav Kım (orys bólimi) men Sh.Esenov atyndaǵy Kaspıı memlekettik tehnologııalar jáne ınjınırıng ýnıversıtetinen kelgen Elvıra Shotaeva (qazaq bólimi) ekinshi, Q.Jubanov atyndaǵy Aqtóbe óńirlik memlekettik ýnıversıtetinen Jandos Sársekov, S.Báıishev atyndaǵy Aqtóbe ýnıversıtetinen Sandýǵash Sheńgelbaı (ekeýi de qazaq bólimi), Batys Qazaqstan ınnovatsııalyq-tehnıkalyq ýnıversıtetinen Álimbek Ahmetqalıev (orys bólimi) úshinshi oryndy ıelendi.
Jeńimpaz-júldegerler dıplomdarmen, syılyqtarmen marapattaldy.
