Oralda múmkindigi shekteýli balalarǵa kúsh qoldanǵan muǵalim sottaldy
ORAL. QazAqparat – Oralda múmkindigi shekteýli balalarǵa kúsh qoldanǵan muǵalim sottaldy, dep habarlaıdy QazAqparat tilshisi.
BQO prokýratýrasynyń baspasóz qyzmeti málim etkenindeı, Oral qalasy prokýratýrasy júrgizgen taldaý barysynda múmkindigi shekteýli balalardy qınaý deregi anyqtaldy.
Atap aıtqanda, oblystyq estý jáne sóıleý qabileti buzylǵan balalarǵa arnalǵan mektep-ınternaty kesheniniń dene shynyqtyrý pániniń muǵalimi K. múmkindigi shekteýli jasóspirimderdi doppen uryp-soǵyp, júıeli túrde kúsh qoldanǵan.
Qala prokýratýrasynyń bastamasymen Oral qalasy polıtsııa basqarmasynyń Abaı bólimi K-ge qatysty QR QK 110-baby 1-bóligi 2-tarmaǵyna (udaıy uryp-soǵý nemese ózge de kúsh qoldaný áreketteri arqyly tán zardabyna nemese psıhıkalyq zardap shegýge ushyratý) sáıkes sotqa deıingi tergeý amaldaryn júrgizdi.
Alaıda múmkindigi shekteýli balalardyń zańdy ókilderi men ata-analary tarapynan shaǵym túspeýine jáne qylmys quramynyń bolmaýyna baılanysty is toqtatyldy.
Qabyldanǵan sheshimmen prokýratýra kelisken joq. K-ǵa qatysty qylmystyq isti toqtatý týraly sheshimniń kúshi joıylyp, sotqa qaıta joldandy.
Oral qalalyq sotynyń úkimimen burynǵy muǵalim QR QK 140-baby 2-bóligine (kámeletke tolmaǵan adamǵa qatygezdik tanytyp, ony tárbıeleý jónindegi mindetterdi oryndamaý nemese tıisinshe oryndamaý) sáıkes aıypty dep tanylyp, ol 80 saǵat kóleminde qoǵamdyq jumysqa tartyldy.
Sot úkimi zańdy kúshine engen joq.
Eske sala keteıik, budan buryn Oralda jasóspirimder eńbegin zańsyz paıdalaný derekteri belgili bolǵanyn jazǵan edik.
