Oralda múgedekterdi ońaltý ortalyǵy salynbaq

ORAL. QazAqparat – Oral qalasynda 8 mlrd teńgege múgedekterdi ońaltý ortalyǵy salynbaq, dep habarlaıdy QazAqparat tilshisi.

BQO qurylys basqarmasynyń basshysy Álibek Antazıevtiń óńirlik kommýnıkatsııalar qyzmeti alańynda ótken brıfıngide málim etkenindeı, «Aqjaıyq» shaǵyn aýdanynda 150 oryndyq ortalyq qurylysy bıyl bastalmaqshy.

Onyń sózine qaraǵanda, nysannyń jalpy quny – 8 mlrd teńge. Qazirgi tańda respýblıkalyq bıýdjetten 1 mlrd teńge bólingen.

«Kúni búgin qujattar ázirlenýde, mamyr aıynda konkýrs jarııalanatyn bolady. Ortalyq qazirgi zamanǵy medıtsınalyq jabdyqpen qamtylady. Osy kezge deıin oblysta múgedekter úshin mundaı ortalyq bolǵan joq. Onda sondaı-aq emdeý-júzý basseıni, sport zaly, akt zaly, eńbek terapııasy, dene shynyqtyrý aımaǵy ornalaspaqshy. Ortalyqta múgedekter kez kelgen aýrý men jaraqattan keıin saýyǵatyn bolady», dedi Á.Antazıev.

Eske sala keteıik, budan buryn Oralda Mánshúk Mámetova atyndaǵy halyqaralyq áýejaı ǵımaraty paıdalanýǵa berilgenin jazǵan bolatynbyz.