Oralda múgedekterdi qoldaý maqsatynda 12 joba júzege asyryldy
ORAL. QazAqparat - Oral qalasynda múgedekterge qolaıly bolýy úshin barlyq alty emhanada dybystyq habarlamamen elektrondy taqtalar ornatyldy. Bul týraly qala ákimi Narıman Tóreǵalıev málim etti, dep habarlaıdy «QazAqparat» HAA tilshisi.
Onyń aıtýynsha, shaharda múmkindigi shekteýli jandardyń máselelerimen aınalysatyn úkimettik emes uıymdardyń usynys-suraqtary naqty sheshilýde. Mysaly, ótken jyl sońynda paıdalanýǵa berilgen qalalyq kóp beıindi aýrýhana janynda ınsýlt soqqan naýqastardy erte emdeýge arnalǵan jáne jaraqattardan ońaltý bólimderi ashylsa, barlyq emhanalarda bir-birden kóp beıindi kerýetter men birneshe arba bar. Oblystyq keńes berýshi-dıagnostıkalyq ortalyqta jáne oblystyq klınıkalyq aýrýhanada aqparat quraly sensorlyq taqta túrinde ornalastyrylǵan. Osy emdeý mekemelerinde sanıtarlyq-turmystyq bólmeler múmkindigi shekteýli jandar úshin beıimdelgen. Oǵan qosa Astana-Oral baǵytynda júretin poıyzda arbada otyratyn múgedekterge arnalǵan eki kýpe qarastyrylǵan. Oral áýejaıynda múgedekter avtokólikteri úshin turaq, birinshi qabatta múmkindigi shekteýli jandarǵa arnalǵan demalys bólmesi ashyldy.
Ótken jyly jumyspen qamtý ortalyǵyna múmkindigi shekteýli 169 adam jolyqsa, sonyń 163-i memlekettik qoldaý sharalarymen qamtyldy. Sonyń ishinde 50-i turaqty jumys ornyn tapty.
Jalpy, qala ákimdigi Elbasy tapsyrmasyna sáıkes múmkindigi shekteýli jandardy qoldaý jumystaryn udaıy júrgizip keledi. Kún saıyn ardagerler men erekshe qamqorlyqty qajet etetin adamdarǵa 8 memlekettik qyzmet túri kórsetiledi. 2016 jyly memlekettik áleýmettik tapsyrys negizinde 236,3 mln. teńgege 12 joba júzege asyrylyp, sonyń aıasynda 3500 adam qamtyldy. Sonyń ishinde 907-si jeke kómekshi jáne ymmen túsindiretin maman kómegimen qamtamasyz etildi. Sondaı-aq 61 adam múgedek arbasymen, 253 adam protez-ortopedııalyq kómekpen, 478 adam sanatorlyq-kýrorttyq emdeýmen qamtyldy. Mundaı jumystar bıyl da jalǵasady.
«Múmkindigi shekteýli jandardyń arasynda qoǵamdyq ómirge belsene qatysatyn, óziniń kúsh-qabileti men áleýetin kórsetip júrgender az emes. Aıtalyq, ótken jyldyń ózinde 5 adam shaǵyn nesıe alyp, óz kásibin ashty. Bul nesıeler shashtaraz, temir buıymdaryn jasaý tsehyn ashýǵa, sútti sıyrlardy ósirýge, jolaýshy tasymaldaýǵa jáne 50 oryndyq dámhana ashýǵa jumsaldy. Mundaı qulshynys, árıne, qýantady», dedi «QazAqparat» tilshisine N.Tóreǵalıev.
