Oralda múgedekter úshin bos jumys oryndarynyń jármeńkesi uıymdastyryldy

ORAL. 16 tamyz. QazAqparat - 15 tamyz kúni Oraldaǵy jastar mádenıet saraıynda oblystyq ishki saıasat basqarmasynyń jáne qalalyq jumyspen qamtý jáne áleýmettik baǵdarlamalar bóliminiń qoldaýymen «Batys Qazaqstan oblystyq Semeı ıadrolyq synaq polıgony múgedekteri qoǵamy» qoǵamdyq birlestigi múgedekterge arnalǵan bos oryndar jármeńkesin ótkizdi.

Mundaı jármeńke budan buryn Oralda bıylǵy 7 maýsymda uıymdastyrylǵan edi. «Batys Qazaqstan oblystyq Semeı ıadrolyq synaq polıgony múgedekteri qoǵamy» qoǵamdyq birlestigi uıymdastyrǵan sol jármeńkede 75 jumyssyz tirkelip, olardyń 45-i sol boıda jumysqa ornalasyp, qalǵandary qaıta daıarlaý kýrstaryna joldanǵan.

- Birinshi ret uıymdastyrylǵan jármeńke nátıjesinde eńbek etýge qulshynysy joǵary múgedek jandar az emesine kózimiz jetti. Tirkelgen jumyssyzdardyń basym bóligi jumysqa turdy. Búgingi sharadan da oń nátıje kútemiz, - deıdi oblystyq ishki saıasat basqarmasy úkimettik emes jáne dinı birlestiktermen jumys bóliminiń bastyǵy Jamal Ihsanova.

Jármeńkege 30 mekeme qatysyp, 300-deı bos oryn usynyldy. Olardyń ishinde operator, kúzetshi, býhgalter, júıelik uıymdastyrýshy sekildi mamandyqtar bar.