Oralda mototsıkl júrgizýshileri arasynda tártip buzý jıilep otyr
ORAL. QazAqparat - Oral qalasynda mototsıkl júrgizýshiler arasynda tártip buzý jıilep otyr, dep habarlaıdy «QazAqparat» tilshisi.
BQO ІІD jergilikti polıtsııa qyzmetiniń basshysy, polıtsııa polkovnıgi Manarbek Ǵabdýllınniń aıtýynsha, bıylǵy bes aıda oblys aýmaǵynda mototsıkl júrgizýshileriniń qatysýymen 10 jol-kólik oqıǵasy boldy. Sonyń saldarynan bir adam qaza taýyp, tórteýi túrli jaraqat aldy.
Jaz shyǵysymen qala kóshelerinde mototsıklder de kóbeıedi. Tıisti qujatsyz jáne qaýipsizdik quraldarynsyz júrgen mototsıkl júrgizýshilerine azamattardan shaǵym túsip jatady. Osyndaı quqyqbuzýshylyqtyń aldyn alý maqsatynda 17 maýsym kúni jergilikti polıtsııa qyzmetkerleri arnaıy reıd ótkizdi. Shara kezinde mototsıkl men skýterdiń 20 júrgizýshisi tekserilip, barlyǵy 7 ákimshilik hattama toltyryldy. Sonyń ishinde úsheýi tıisti qujatyz júrgeni, bireýi mindetti saqtandyrý kelisimshartyn jasaýdan jaltarǵany, ekeýi memlekettik tirkeý nómirinsiz kólik quralyn basqarǵany, taǵy bireýi motodýlyǵa kımegeni úshin jaýapqa tartyldy. Arnaıy turaqqa 3 motokólik qoıyldy.
«Jeńil avtokólik júrgizýshilerine qaraǵanda, jol-kólik oqıǵasy kezinde mototsıklshilerge kóbirek qaýip tónedi. Sondyqtan olar dýlyǵasyn kıip, qaýipsizdik talaptaryn qatań saqtaýy tıis», dedi M.Ǵabdýllın.
