Oralda monshalardyń órtenýi jıilep ketti
ORAL. QazAqparat - Oral qalasynda bıylǵy úsh aıda 70 órt oqıǵasy tirkeldi, dep habarlaıdy «QazAqparat» tilshisi.
Oral qalasy TJ basqarmasynyń bas mamany, azamattyq qorǵaý maıory Olga Protopopovanyń aıtýynsha, sonyń ishinde monshalardyń otqa oranýy jıilep otyr. Mysaly, 4 qańtarda monsha kesheni aýmaǵyndaǵy saýna órtenip, onyń aýmaǵy 160 sharshy metrdi qurady. Sol sekildi 7 qańtarda jeke úıdiń aýlasynda ornalasqan aýmaǵy 35 sharshy metr monsha otqa orandy. 14 qańtarda taǵy bir jeke úıdiń aýlasynda monshanyń tóbesi (60 sharshy metr) jalynǵa sharpyldy. 22 qańtarda saýnanyń býlaý bólmesi órtense, 3 aqpanda jeke úıdegi taǵy bir monsha (18 sharshy metr) janyp ketti. Tizimdi osylaısha jalǵastyra berýge bolady. Munyń bári órt qaýipsizdigi erejelerin saqtamaýdan bolyp otyr. Ásirese, tútin shyǵatyn jerdiń talapqa saı jasalmaýynan, elektr symdarynyń eskirýi men zaqymdanýynan órt jıi shyǵady.
Aıta keteıik, ótken jyly qalada 250-den astam órt bolyp, sodan 2 mln. teńge shyǵyn keldi. Eń ókinishtisi, 2 adam qaza taýyp, 25-i túrli jaraqat aldy.
