Oralda monsha órtenip ketti
ORAL. QazAqparat – Oralda monsha órtenip ketti, dep habarlaıdy QazAqparat.
BQO TJ departamentinen túsken málimetke qaraǵanda, oqıǵa keshe bolǵan. Jeke turǵan monsha otqa oranyp, órt aýmaǵy 100 sharshy metrdi qamtydy.
«Tilsiz jaý» órt sóndirý qyzmetiniń kúshimen (17 adam, 5 tehnıka) saǵat 03.50-de aýyzdyqtaldy. Zardap shekkender joq.
Órttiń shyǵý sebebi, keltirilgen shyǵyn, kináli adamdar anyqtalý ústinde.
Departament bastyǵy Jasulan Jumashevtyń aıtýynsha, sońǵy kúnderi sondaı-aq Aqjaıyq, Terekti, Báıterek, Bókeı ordasy jáne Shyńǵyrlaý aýdandarynda órt oqıǵalary tirkeldi.
20 maýsym kúni saǵat 14.43-te Aqjaıyq aýdany Taıpaq aýylynda Qurmanǵazy kóshesi 17-mekenjaıda aýmaǵy 55 sharshy metr sharýashylyq qurylysy jandy. Sol kúni Terekti aýdany Podstepnyı, 21 maýsym kúni Báıterek aýdany Şapov aýyldarynda qora-qopsy órtendi. Shyńǵyrlaý aýdany Qyzylkól aýylynda sharýashylyq qurylysy men 12 tonna pishen janyp ketti. Bókeı ordasy aýdany Han ordasy aýylynda da qora-qopsyǵa qosa 0,3 tonna shóp órtengen.
Oral qalasy «Volna» saıajaı qoǵamynda 21 maýsym kúni saǵat 21.04-te adam turmaıtyn saıajaı úıi (40 sharshy metr) otqa orandy.
«Órttiń negizgi sebepteri otpen abaı bolmaý, elektr quraldaryn paıdalaný kezinde órt qaýipsizdigi erejelerin saqtamaýdan týyndap otyr. Sonymen qatar mal azyǵyn daıyndaý jáne jınap, saqtaý kezinde de asa muqııat bolý kerek. Kún ystyq kezde sóndirilmegen alaý, laqtyra salynǵan sirińke men temeki tuqylynan da ot tutanyp ketýi ábden múmkin», dedi J.Jumashev.
Eske sala keteıik, budan buryn BQO-da jol ústinde eki tirkeme órtenip, 5 tonna shóp janyp ketkenin jazǵan bolatynbyz.
