Oralda modýldik aýrýhana qurylysy aıaqtalyp keledi
NUR-SULTAN. QazAqparat – Oral qalasynda modýldik juqpaly aýrýlar aýrýhanasynyń qurylysy aıaqtalyp keledi, dep habarlaıdy QazAqparat tilshisi.
Oblys ákimi Ǵalı Esqalıevtiń málim etkenindeı, tez salynyp jatqan 200 tósektik aýrýhana qurylysy 95 paıyzǵa aıaqtalǵan.
Óńirde kún saıyn 30-dan 45-ke deıin koronavırýs juqtyrǵandar tirkelýde. Bul alańdatpaı qoımaıdy. Munyń bir sebebi – Batys Qazaqstan Reseıdiń bes birdeı oblysymen shektesedi. Kún saıyn 2 myń – 2500-deı adam shekaradan ótedi. Olardyń arasynda júrgizýshiler, jaıaý júrginshiler de bar.
«Biz zerthanalar sanyn ulǵaıttyq. Qazir táýligine 2750-ge deıin zertteý jasaı alatyn 8 zerthana bar. Táýligine 1200-den 1600-ge deıin zertteý jasalýda. Oblysta 7 juqpaly aýrýlar statsıonary bolsa, qazir olar 33,2 paıyzǵa tolǵan. Rezervte 2028 tósek (1253 juqpaly aýrýlar, 775 karantındik) ázirlendi. Oblystyń medıtsına uıymdary qajetti qural-jabdyqtarmen qamtamasyz etilgen. Medıtsına qyzmetkerleriniń tapshylyǵy joq. Dári-dármek te jetkilikti», dedi Ǵ.Esqalıev.
Eske sala keteıik, budan buryn BQO-da paıdalanylmaı jatqan 909,8 myń gektar aýyl sharýashylyǵy jeri anyqtalǵanyn, ónerkásip óniminiń kólemi 1,4 trln teńgege jetkenin, Oralda «Aqjaıyq» shaǵynaýdanynda aldaǵy jyly turǵyn úı salý bastalatynyn jazǵan bolatynbyz.
Oblys ákimi «sary qyzdyń» elesine baılanysty túsinik berdi.
Sondaı-aq Batys Qazaqstanda shalǵaıdaǵy 70 eldi meken ınternetpen qamtylatyn boldy.
