Oralda mınıstrdiń qatysýymen qorǵanys kásiporyndarynyń máselesi talqylandy
Mınıstr aldymen «Batys Qazaqstan mashına jasaý kompanııasy» AQ jáne «Oral «Zenıt» zaýyty» AQ syndy qorǵanys salasyna qatysty ónim shyǵaratyn jergilikti kásiporyndardyń jumysymen tanysty.
«Qazaqstan ınjınırıng» UK» AQ quramyna enetin «Zenıt» zaýyty elimiz táýelsizdik alǵannan bergi kezeńde 27 keme-katerdi qurastyryp shyǵardy. Zaýyt 2017 jyly 8,7 mlrd teńgeniń ónimin óndirdi, bul aldyńǵy jylǵydan 1,7 esege kóp. Degenmen qazirgi kezde zaýyt júktemesi 25 paıyzdy quraıdy.
«Zenıt» zaýyty keme jasaýmen aty shyqsa, «Batys Qazaqstan mashına jasaý kompanııasy» AQ - Qazaqstan men Ortalyq Azııada atys qarýlaryn shyǵaratyn birden-bir kásiporyn. Zaýyt sondaı-aq munaıgaz salasynda paıdalanylatyn jabdyqtar shyǵarýmen de aınalysady. Ótken jyly bul kásiporyn 6,5 mlrd teńgeniń ónimin shyǵardy. Kúni búgin zaýyt júktemesi 90 paıyzdy quraıdy.
Oblys ákimdiginde ótken keńeste óńir basshysy Altaı Kólginovtiń málim etkenindeı, Elbasy N.Á.Nazarbaev jýyrda BQO-ǵa sapary kezinde ónerkásip keshenin damytý men jańǵyrtý baǵytynda birqatar tapsyrmalar bergen bolatyn. Qazirgi tańda oblys zaýyttarynda 2 myńnan astam adam jumys jasaýda. 2017 jyly 20 mlrd astam teńgeniń ónimi óndirilip, 3,5 mlrd astam salyq tólendi. Endigi mindet - qolda bardy saqtaı otyryp, salany odan ári damytý. 
Beıbit Atamqulov óz sózinde áskerı-tehnıkalyq saladaǵy memleket saıasaty, qorǵanys ónerkásibi kásiporyndaryn nyǵaıtý men qaıta jańǵyrtý máselelerine nazar aýdardy.
«Biz birqatar ózekti máselelerdi talqyladyq. Qazirgi kezde Qazaqstandaǵy qorǵanys ónerkásibi kesheniniń júktemesi orta eseppen 50 paıyzdy, Batys Qazaqstanda 60 paıyzdy quraıdy. Osy 60 paıyzdyń ishinde memlekettik tapsyrys úlesi - 84 paıyz. Sondyqtan tek memlekettik qoldaý sharalaryna ıek artpaı, azamattyq maqsattaǵy ónimder úlesin 30-50 paıyz deńgeıinde ustaý qajet. Bıyl mınıstrlik áskerı-tehnıkalyq yntymaqtastyq boıynsha ýákiletti organǵa aınaldy. Sondyqtan alda turǵan mindetterdi birlesip sheshýimiz kerek. Sonyń ishinde óndiristi dıversıfıkatsııalaý, básekege qabiletti jáne eksportqa baǵyttalǵan ónimder shyǵarýǵa, tehnıkalyq baılanysty nyǵaıtýǵa kúsh salýymyz qajet», dedi mınıstr.
