Oralda meıramhanadaǵy toıǵa 150-den astam adam qatysqan
ORAL. QazAqparat – Oralda sot sheshimimen jabylǵan meıramhanadaǵy toıǵa 150-den astam adam qatysqan, dep habarlaıdy QazAqparat tilshisi.
Oral qalasy ákimi apparatynyń bólim basshysy Aslan Jarmuhanovtyń málim etkenindeı, 8 jeltoqsan kúni keshkisin «Juldyz» shaǵynaýdanyndaǵy «Aızat» meıramhanasynyń banket zalynda toı bolyp jatqany jóninde turǵyndar habarlaǵan.
Monıtorıngtik top músheleri barǵan kezde aqparat ras bolyp shyqty.
-Bir saǵattan keıin ishtegiler artqy esikti ashqan kezde toı qonaqtary qashyp shyǵyp jatty. Biz 150-den astam adamdy sanadyq, - dedi A.Jarmuhanov.
Onyń sózine qaraǵanda, meıramhana ıesi, mýzykant, toıdy uıymdastyrýshylardan jaýap alyndy. Tıisti sharalar qabyldaý úshin barlyq materıal Oral qalasy sanıtarlyq-epıdemıologııalyq baqylaý basqarmasyna jiberildi.
«Aızat» - sot sheshimimen jabylǵan alty meıramhananyń biri.
Oblystyq sanıtarlyq-epıdemıologııalyq baqylaý departamentiniń naqtylaýynsha, sot sheshimimen sanıtarlyq talaptardy qaıtalap buzǵany úshin «Aızat», «Albına+», «Maqpal», «Adelıa» meıramhanalary, «Gakký», «Marsel» kafeleriniń qyzmeti úsh aıǵa toqtatylǵan edi. Bul baǵyttaǵy jumystar jalǵasatyn bolady.
Eske sala keteıik, budan buryn BQO-da 1,2 myńnan astam adamnyń zerthanalyq tekserýden ótkenin jazǵan bolatynbyz.
