Oralda meshitte urlyq jasaǵan suǵanaq sottaldy
ORAL. QazAqparat - Oralda búgin meshitte urlyq jasaǵan suǵanaqqa qatysty sot úkimi shyqty, dep habarlaıdy «QazAqparat» tilshisi.
Oral qalalyq sotynan túsken málimetke qaraǵanda, Qýandyq Qalımov ótken jylǵy jeltoqsanda J.Dosmuhamedov kóshesi boıyndaǵy qalalyq jáne odan keıin qyzyl meshitke kelip, syrtqy kıimderin ilgishke ilip qoıǵan tórt qala turǵynynyń kúrteleriniń qaltasyna túsken. Barlyǵy 303 myń teńgeni jymqyrǵan.
Onymen qoımaı, 25 jeltoqsan kúni saǵat 06.00 shamasynda Atyraý-Oral joly boıynda jábirlenýshi Sh-ǵa birneshe márte soqqy jasap, onyń shalbarynyń qaltasynan jeke kýáligin, bankomattyq kartochkasyn, 185 myń teńgesin ashyq túrde sýyryp alyp, oqıǵa ornynan boı tasalaǵan.
Jábirlenýshiler sottan Q.Qalımovti keshiretinin, materıaldyq zalaldyń óndirilgenin aıtyp, ony QR QK 68-baby 1-bóligine sáıkes qylmystyq jaýapkershilikten bosatýdy suraǵan.
Sot Q.Qalımovqa jaza kesken kezde qylmystyń sıpaty men qoǵamǵa qaýiptiligin, aýyr qylmys jasaǵanyn, buryn sottalǵanyn eskerdi.
Oral qalalyq soty QR QK 188-baby 2-bóligi 2-tarmaǵy, 68-baby 1-bóligine sáıkes jábirlenýshiler A.Qaıyrbaev, J.Erkinov, R.Otaraly, Ǵ.Nyǵmetovke qatysty epızodtary boıynsha ózara tatýlasýlaryna baılanysty sottalýshyny qylmystyq jaýapkershilikten bosatty. Áıtse de Q.Qalımov QR QK 191-baby 2-bóligi 1-tarmaǵymen aıypty dep tanylyp, 3 jylǵa bas bostandyǵynan aıyryldy.
QR QK 60-babyna sáıkes úkimderdiń jıyntyǵy boıynsha Atyraý qalalyq sotynyń 2016 jylǵy 13 qazan kúngi úkimimen kesilgen jazasynyń ótelmegen bóligi ishinara qosylyp, Q.Qalımov túpkilikti 3 jyl 2 aıǵa bas bostandyǵynan aıyrý jazasyn qaýipsizdigi orta qylmystyq-atqarý júıesi mekemesinde óteýge sottaldy.
Sot úkimi kúshine engen joq.
Eske sala keteıik, Atyraýdan kelip, meshitke kelýshilerdiń qaltasyna túsken ury týraly budan buryn jazǵan bolatynbyz.
