Oralda «Merkýrıı» saýda úıinde órt boldy
ORAL. QazAqparat - Oralda Gagarın kóshesi 70-mekenjaıynda «Merkýrıı» saýda úıinde órt boldy, dep habarlaıdy «QazAqparat» tilshisi.
BQO TJ departamenti órt sóndirý jáne apattyq-qutqarý jumystary qyzmetiniń baspasóz hatshysy Jazıra Ábdirahmanovanyń aıtýynsha, saýda úıiniń janyp jatqany jóninde keshe saǵat 18.28-de habar túsken.
Oqıǵa ornyna órt sóndirýshiler jeti mınýttan soń jetken kezde saýda úıiniń qoımasynda esikterdiń otqa oranǵany anyqtaldy. Órt sóndirýshilerdiń jedel de úılesimdi is-qımyly nátıjesinde «tilsiz jaýdyń» taýar-materıaldyq qundylyqtar saqtalǵan kórshi qoımalarǵa, jalpy aýdany myń jarym sharshy metrden asatyn saýda úıine odan ári taralýyna jol berilgen joq. Saǵat 20.11-de beti qaıtyp, 21.09-de sóndirilgen órt aýmaǵy 80 sharshy metrdi qamtydy. Oǵan 25 adam, 12 tehnıka jumyldyryldy.
Zardap shekkender joq.
