Oralda merekelik festıvalǵa 3 myń bala qatysty
ORAL. KAZINFORM – Oralda «Qazaqstan balalary» tujyrymdamasy aıasyndaǵy onkúndik búgin Tuńǵysh Prezıdent alańynda ótkizilgen «Men baqytty balamyn!» atty festıvalmen qorytyndylandy.
Úsh myń bala merekelik is-sharaǵa jınalyp, balalar men ata-analardy BQO ákimi Narıman Tóreǵalıev quttyqtady.
Óńir basshysynyń málim etkenindeı, bıylǵy jyly Halyqaralyq balalardy qorǵaý kúnin atap ótý Bala quqyqtary týraly konventsııa erejelerine sáıkes memleket pen qoǵamnyń nazaryn árbir jas qazaqstandyqtyń ál-aýqatyn arttyrýǵa aýdarýǵa baǵyttaldy. Bul óz kezeginde bolashaq urpaqtyń jan-jaqty damýyna qolaıly jaǵdaı jasaý jolyndaǵy memleket tarapynan atqarylyp jatqan ıgi bastamalardyń aıqyn kórinisi bolmaq.
– Memleket basshysynyń bilim salasyna qatysty tapsyrmalaryn jáne strategııalyq mańyzy bar qujattardy sapaly júzege asyrý baǵytynda oblysta aýqymdy jumystar atqarylýda. Jyl saıyn aýyl mektebin jańǵyrtý, qoldanystaǵy mektepterdi kúrdeli jóńdeý jáne zamanaýı pándik kabınettermen jabdyqtaý jumystary júrgizilýde. Bıylǵy oqý jylynda 193 robototehnıka, hımııa, bıologııa, fızıka jáne STEM-pánder boıynsha zamanaýı pándik kabınetter jabdyqtaldy. 2024-2025 oqý jylynda oblys boıynsha 365 mektepte balalar 100 paıyz ystyq tamaqpen qamtyldy, - dedi N.Tóreǵalıev.
Merekelik is-shara balalardyń jazǵy demalysyn mazmundy ótkizýge baǵyttalǵan túrli alańdarmen erekshelendi.
«Jazǵy kitap álemi» alańynda balalarǵa arnalǵan kitaptar tanystyrylyp, olardyń oqýǵa qyzyǵýshylyǵyn arttyrýǵa mán berildi.
«Salaýatty ómir – jarqyn bolashaq kepili» alańynda densaýlyqty saqtaý men nyǵaıtýdyń mańyzdylyǵy túsindirildi.
«Qaısar júrek» alańynda qaýipsizdik erejeleri úıretilip, jasóspirimder qaýipsizdigine nazar aýdaryldy.
«Otbasy – baqyt mekeni» alańynda otbasylyq qarym-qatynasty nyǵaıtýǵa baǵyttalǵan sharalar ótti.
«Serpin» jáne «Óner men qııal álemi» alańdarynda balalardyń shyǵarmashylyq qabiletterin damytý jumystary júrgizildi.
«Robotálem» alańynda zamanaýı tehnologııalarmen tanysý múmkindigi usynyldy. Balalar robottarmen oınap qana qoımaı, qarapaıym modelderdi qurastyrdy.
Vırtýaldy shyndyq aımaǵynda VR kózildirikteri arqyly jetkinshekter qyzyqty álemge saıahat jasady jáne túrli LEGO konstrýktorlarmen qyzyqty jobalar qurastyryp, tehnıka negizderin túsindi.
Kreatıvti fotobólikte balalar jańa tehnologııalar taqyrybynda fotosýretke tústi.
«Ózgeristi ózińnen basta!» alańynda kóshbasshy oqýshylar jınaldy. Olar qalany damytý boıynsha usynystaryn jetkizdi.
«Jarqyra, balapan!» alańynda ónerli balalar óz talanttaryn kórsetti jáne barlyǵy birge fleshmobke qatysyp, kóńildi oıyndar oınady.
Festıval balalardyń jan-jaqty damýyna, shyǵarmashylyq qabiletterin arttyrýǵa jáne otbasylyq qundylyqtardy nyǵaıtýǵa baǵyttalǵan mazmundy sharalarmen jalǵasyn tapty.
Eske sala keteıik, budan buryn Batys Qazaqstanda jaz kezinde 620-ǵa jýyq lager jumys isteıtinin jazǵan bolatynbyz.