Oralda «Men qazaqpyn» megajobasynyń jeńimpazdary anyqtaldy

«Rýhanı jańǵyrý» baǵdarlamasy aıasynda QR Aqparat jáne kommýnıkatsııalar mınıstrligi men oblystyq ákimshilikterdiń qoldaýymen «Qazaqstan» ulttyq arnasy bıyl ekinshi ret uıymdastyrǵan joba maqsaty - qazaqtyń ulttyq kody bolyp esepteletin án, terme jáne kúı ónerin nasıhattaý.
Baıqaýǵa 18-40 jas aralyǵyndaǵy úmitkerler qatysyp, oblystyń barlyq aýdandarynda irikteý kezeńderi ótti. Solardyń arasynan 136 úmitkerdiń 44-i oza shaýyp, oblystyq kezeńge qatysty. Sonyń ishinde 14-i Jastar mádenıet úıinde ótken gala-kontsertte óner kórsetti.
 

Oblystyq mádenıet basqarmasynyń basshysy Qadyrbolat Musaǵalıev «Men qazaqpyn» birlesken megajobasynyń el ishinde kórinbeı júrgen jas talanttardy taýyp, úlken sahnaǵa shyǵarýda mańyzy zor ekendigin jetkizdi.

Belgili ánshi-termeshi, Qazaqstannyń eńbek sińirgen qaıratkeri, qazylar alqasynyń tóraǵasy Hatımolla Berdiǵalıev burynǵy óner baıqaýlaryndaı emes, bas júlde, birinshi-úshinshi oryndary joq bul saıysta ár janrdan bir-bir adamnan tańdaý ońaılyqqa túspegendigin aıtty.
«Júırikten júırik ozar jarysqanda» demekshi, biz úmitkerlerdiń repertýaryna da qaradyq. Respýblıkalyq kezeńde dodaǵa túskende, olar ár mekteptiń týyndysyn oryndaı bilýi kerek. Jeńimpazdardyń áli aı jarymdaı ýaqyty bar. Ótken jyly tálimgerler basqa jaqtan kelip, shákirtterin tańdap alyp ketken bolatyn. Bıylǵy jańalyq, oblystan óz tálimgerleri qastarynda júredi. Elbasy Jarlyǵymen shildeniń birinshi jeksenbisi Ulttyq dombyra kúni bolyp belgilendi. Bul - óner adamdary úshin úlken qýanysh ári qoldaý. Endi ár qazaq sol kúni alańda bolsyn, úıinde bolsyn dombyra tartyp, ulttyq ónerimizdi odan saıyn asqaqtata alady», dedi H.Berdiǵalıev.

Osylaısha Tasqala aýdanynan kelgen Beıbit Qajyǵalıev «Úzdik ánshi», oraldyqtar Tilek Bazarov «Úzdik termeshi» jáne Jasulan Zınedenov «Úzdik kúıshi» atandy. Endi olar Astana tórinde ótetin fınaldyq kezeńde óner kórsetetin bolady.