Oralda Memlekettik Tý kóterilip, Respýblıka kúni atalyp ótti
Oral qalasynda Memlekettik Tý kóterilip, Respýblıka kúni atalyp ótti, dep habarlaıdy Kazinform.
Aldymen Tuńǵysh Prezıdent alańynda Memlekettik Tý kóterilip, Memlekettik Gımn oryndaldy.
Tý kóterý saltanatyna oblys ákimi Narıman Tóreǵalıev bastaǵan óńir jurtshylyǵy qatysty.
Sodan keıin «Atameken» óner ordasynda «Máńgi jasa, qyran elim – Qazaqstanym!» atty merekelik is-shara ótkizildi.
Oblys ákimi Narıman Tóreǵalıev quttyqtaý sózinde Respýblıka kúniniń mán-mańyzyna toqtaldy.
«Respýblıka kúnine oraı ótken saltanatty jıynda Qazaqstan Prezıdenti Qasym-Jomart Kemeluly Toqaev «Bul – qazaqtyń memlekettilik dástúri qaıta jańǵyrǵan tarıhı kún. Kók túrikter dáýirinen, Altyn Orda, Qazaq handyǵy zamanynan kele jatqan eldigimiz tamyryn tapqan kún. Bul – Alash arystarynyń azattyq jolyndaǵy arpalysy aqtalǵan kún» dep erekshe baǵa berdi. Respýblıka kúni – eldigimizdi nyǵaıtatyn, birligimizdi bekemdep, yntymaǵymyzdy arttyratyn aıshyqty mereke. Bul jaı ǵana mereke emes, bul – bizdiń halqymyzdyń memlekettiligimizdi saqtaýǵa jáne nyǵaıtýǵa, Ádiletti Qazaqstan qurýǵa degen umtylysy. Barsha qazaqstandyqtar belsene atsalysqanda ǵana osy ıgi maqsatqa qol jetkize alamyz. Sebebi memlekettiń tiregi de, basty baılyǵy da – el azamattary!» dedi óńir basshysy.
Saltanatty jıyn barysynda 70-ke jýyq adamǵa memlekettik nagrada tapsyryldy. Onda eńbek ardagerleri, mádenıet, aýyl sharýashylyǵy qyzmetkerlerine basymdyq berildi.
Merekelik is-shara kontserttik baǵdarlamaǵa ulasty.
Respýblıka kúnine arnalǵan merekelik is-sharalar oblystyń barlyq aýdanynda uıymdastyryldy.
