Oralda «Memlekettik til jáne azamattyq qoǵam» taqyrybynda dóńgelek ústel otyrysy boldy
Onda oblystyq ishki saıasat basqarmasy bastyǵynyń orynbasary Azamat Safımalıev kirispe sózinde Elbasymyz Nursultan Nazarbaev memlekettik tildiń aıasyn keńeıtýde naqty mindetter qoıyp otyrǵanyn atap ótti.
Halyqaralyq «Qazaq tili» qoǵamy oblystyq fılıalynyń tóraǵasy Bolat Jeksenǵalıev BQO qoǵamdyq uıymdary janynan qurylǵan qoǵamdyq keńestiń tujyrymdamasy, keńes quramy jáne jumys josparyna toqtaldy. Sondaı-aq «Qazaq tili» qoǵamy qalalyq uıymynyń tóraǵasy, fılologııa ǵylymdarynyń doktory, professor Murat Sabyr Túrkııada memlekettik tildiń qalaı engizilgendigin aıtyp ótse, oblystyq bólimshe atynan sóz alǵan fılologııa ǵylymdarynyń kandıdaty Altynbek Abdýlmanov «Qaztest» júıesimen tanystyrdy. Ásirese, «Qaztest» júıesinen árkimniń de ótýi kerektigi aıtyldy. Sonymen qatar memlekettik til týraly jańa zańdy tezirek qabyldaý, memlekettik qyzmetkerlerge qazaq tilin bilýdi mindetteý, ózge ult ókilderine til úıretý týraly sóz boldy.
Jıynda atalmysh qoǵamdyq keńestiń quramy men jumys jospary bekitilip, aıtylǵan usynys-pikirler joǵary organdarǵa jiberiletin bolyp sheshildi.
