Oralda memlekettik satyp alý salasyndaǵy jańa tásilder talqylandy
Aqtóbe, Atyraý, Mańǵystaý, Batys Qazaqstan oblystary jergilikti atqarýshy organdary men ákimdikteriniń, «Atameken» Ulttyq kásipkerler palatasy jáne úkimettik emes uıymdar ókilderi qatysqan jıynda QR qarjy vıtse-mınıstri Rýslan Beketaevtyń atap ótkenindeı, memlekettik satyp alý barysyndaǵy kedergilerdi joıý maqsatynda Elbasynyń bıylǵy Joldaýyna sáıkes zań jobasy jasalǵan bolatyn. Osyǵan baılanysty Úkimettiń aldyna eki mindet qoıylyp otyr, onyń biri - ortalyqtandyrylǵan qyzmet qaǵıdasy boıynsha memlekettik satyp alýdyń biryńǵaı júıesin engizý. Ekinshisi - kvazımemlekettik, tabıǵı monopolııalar jáne jer qoınaýyn paıdalanýshylar salalaryndaǵy memlekettik satyp alý tásilderin túbegeıli qaıta qaraý. Bylaısha aıtqanda, zań jobasy memlekettik satyp alý týraly zańnamany jetildirýge baǵyttalǵan birqatar túzetýler engizýdi kózdeıdi. Parlament Májilisiniń qaraýyna joldanbastan buryn mamandarmen birge óńirlerge shyǵyp, taǵy bir pysyqtap alǵannyń artyqtyǵy joq.
Qarjy mınıstriniń bıylǵy 15 maýsymdaǵy №384 buıryǵyna sáıkes memlekettik satyp alýdy júzege asyrý qaǵıdalaryna ózgerister men tolyqtyrýlar 1 tamyzdan bastap qoldanysqa engizildi. Osyǵan baılanysty oblys ákimi Altaı Kólginov óz usynys-pikirin bildirdi. «Dempıng máselesiniń buryn shekti kólemi bolatyn. Qazir ol alynyp tastaldy. Bul, bir jaǵynan jaqsy, memleket satyp alý sharalary kezinde biraz qarjyny únemdeıdi. Máselen, bizdiń oblysta 2,5 mlrd teńge osylaı únemdeldi. Biraq is júzinde munyń da olqy tusy bar ekenin moıyndaýymyz kerek. Eger jobalaýǵa qatysty aıtar bolsaq, onda jobalyq-smetalyq qujattama (JSQ) negiz bolyp tabylatyny belgili. Eger JSQ sapaly jasalsa, salynatyn qurylys nysany da solaı bolady. Mundaı qujatty tájirıbesi, mamandary bar mekeme daıyndasa, onda sóz joq. Al qaǵaz júzinde ǵana áleýeti jaqsy dep tanylǵan, al shyn máninde ondaı múmkindigi joq kásiporyndar dempıng negizinde tenderdi utyp alyp jatatyn jaǵdaılar kezdesedi. Olar jasaǵan jobalardan artynan túrli másele paıda bolady. ıAǵnı olardyń tájirıbesiniń joqtyǵynan, plagıattylyqpen aınalysýy saldarynan qurylysty júrgizýshiler qınalady. Al tanymal, jaýapkershiligi mol kompanııalar úshin dempıng negizindegi tıesili qarjy tıimsiz. Munyń bári sapaǵa, memlekettik baǵdarlamalardyń talapqa saı oryndalýyna keri áserin tıgizetini aıan. Osyǵan oraı aldaǵy ýaqytta bul baǵyttaǵy talaptardy kúsheıtýdiń joldaryn qarastyrǵan jón», - dedi óńir basshysy.
Bul saýalǵa jaýap bergen vıtse-mınıstr jańa zań jobasynda atalmysh másele qarastyrylǵanyn aıtyp, tómengi shekteýli lımıt belgilengendigin jetkizdi. Qarjy mınıstrligi memlekettik satyp alýda túrli salaǵa qatysty túrli lımıtter engizbekshi. Lımıt kólemi osyndaı jıyndarda talqylanyp, kópshiliktiń usynys-pikiri negizinde ázirlenetin bolady.
