Oralda memleketke 600 mln astam teńge zalal keltirgender sottaldy
Sotta anyqtalǵandaı, «Agrarlyq nesıe korporatsııasy» AQ Batys Qazaqstan jáne Mańǵystaý oblystary fılıaldarynda basshylyq qyzmet atqarǵan Erbolat Ońǵarbek qyzmet babyn paıdalana otyryp, fılıal mamany Bıjan Nurqatovpen aýyz jalasyp, sondaı-aq kásipker Anvarhon Torahanovpen jáne «Ýral» sharýa qojalyǵynyń basshysy Aıdyn Qamzınmen birge asa iri kólemde qarjy jymqyrǵan.
Sonymen qatar sharýa qojalyqtarynyń basshylary Mırjan Arystanov, Nurbergen Jumaǵulov, Málik Erjanov, oǵan qosa Meırambek Baıǵýtıev E.Ońǵarbektiń yqpal etýimen «Agrarlyq nesıe korporatsııasy» AQ fılıaly jáne «Aqjaıyq Agro» nesıe seriktestigi arqyly zańsyz nesıe alǵan.
Atalǵan adamdardyń zańsyz is-áreketteri saldarynan memleketke 600 mln astam teńge kóleminde zalal keltirilgen.
E.Ońǵarbek, A.Torahanov, B.Nurqatov kinálaryn moıyndaǵan joq. Al qalǵandary kinálaryn tolyqtaı moınyna aldy. Oǵan qosa M.Baıǵýtıev, M.Arystanov, N.Jumaǵulov, M.Erjanov qylmysty ashyp, áshkereleýge belsendi járdemdesken.
Sot úkimimen E.Ońǵarbek QR QK 28-baby 5-bóligi, 219-baby 1-bóligine sáıkes aıypty dep tanylǵanymen, qýynym merziminiń ótýine baılanysty qylmystyq jaýapkershilikten bosatyldy.
E.Ońǵarbek QR QK 361-baby 4-bóligi 3-tarmaǵy (laýazymdyq ókilettikterdi teris paıdalaný), 189-baby 4-bóligi 2-tarmaǵyna (senip tapsyrylǵan bóten múlikti ıemdenip alý nemese talan-tarajǵa salý) sáıkes aıypty dep tanylyp, 58-baptyń 3-bólimi qoldanyla otyryp, 9 jylǵa úkim kesildi. Ol sondaı-aq memlekettik qyzmette jáne basqa organdarda laýazymdy qyzmet atqarý quqyǵynan ómir boıyna aıyryldy.
B.Nurqatov QR QK 28-baby 5-bóligi, 219-baby 1-bóligine sáıkes aıypty dep tanylyp, qýynym merziminiń ótýine baılanysty qylmystyq jaýapkershilikten bosatyldy. Ol 219-bap 1-bóligi epızody boıynsha qylmys quramynyń bolmaýyna baılanysty aqtaldy. Degenmen B.Nurqatov QR QK 28-baby 5-bóligi, 189-baby 4-bóligi 2-tarmaǵyna sáıkes 7 jylǵa sottaldy.
A.Qamzın QR QK 189-baby 4-bóligi 2-tarmaǵyna sáıkes aıypty dep tanylyp, 55-baptyń 4-bóligi qoldanyla otyryp, 5 jylǵa bas bostandyǵynan aıyryldy.
Osyǵan deıin úıqamaqta bolǵan B.Nurqatov pen A.Qamzın sot zalynda tutqyndaldy.
A.Torahanov QR QK 189-baby 4-bóligi 2-tarmaǵyna sáıkes 7 jylǵa sottaldy.
Sottalǵandardyń bári de úkim kúshine engen jaǵdaıda jazasyn qaýipsizdigi ortasha qylmystyq-atqarý júıesi mekemesinde óteıdi.
M.Baıǵýtıev, M.Arystanov, N.Jumaǵulov jáne M.Erjanov qýynym merziminiń ótýine baılanysty qylmystyq jaýapkershilikten bosatyldy.
Sýdıa Qaırat Óteshev úkim shyǵarǵan kezde sottalýshylardyń kishkentaı balalary bar ekendigi, qylmystyq jaýapkershilik pen jazany aýyrlatatyn mán-jaıdyń joqtyǵy eskerilgenin jetkizdi.
Sot úkimi kúshine engen joq.
Eske sala keteıik, budan buryn BQO-da para alǵan polıtsııa qyzmetkerine 7,5 mln teńge aıyppul salynǵanyn jazǵan bolatynbyz.
