Oralda mekteptegi oqys oqıǵa saldarynan ǵımarattan 660 adam shyǵaryldy
ORAL. QazAqparat – Oralda mekteptegi oqys oqıǵa saldarynan ǵımarattan 660 adam shyǵaryldy, dep habarlaıdy QazAqparat tilshisi.
BQO TJ departamenti zilzalalardyń qaýip-qaterin azaıtý jáne azamattyq qorǵaý salasyndaǵy baqylaý basqarmasynyń bastyǵy Erlan Tóregeldıevtiń aıtýynsha, oqıǵa búgin saǵat 12.18-de A.Makarenko atyndaǵy №6 orta mektepte boldy.
Hımııa kabınetiniń zerthanasynda sabaq kezinde hımııalyq reagentterdi paıdalanýda qaýipsizdik talaptary buzylǵan. Sonyń saldarynan bý shyqqan, degenmen ol janýǵa ulaspaǵan.
Mektep qyzmetkerlerimen birge ǵımarattan 660 adam evakýatsııalansa, sonyń 600-i – oqýshylar.
Zardap shekkender joq.
Oqıǵa ornyna departamentten 56 qyzmetker, 16 tehnıka bardy.
«Hımııalyq reagenttermen jumys qaýipti. Óıtkeni hımııalyq reagentter adamdarǵa qatty áser etýi múmkin. Sondyqtan jumystyń bul túrin sýyrmaly shkafta júrgizý basty talap bolyp sanalady. Osy qaýipsizdik sharasy saqtalmaǵan», dedi QazAqparat tilshisine E.Tóregeldıev.
