Oralda mekteptegi gazdyń ıisinen birneshe oqýshy jedel járdemge júgindi
ORAL. QazAqparat - Oraldaǵy №40 mektepte gazdyń ıisinen birneshe oqýshy jedel járdemge júgindi, dep habarlaıdy QazAqparat tilshisi.
Atalmysh mektep dırektory Maqsot Ǵalıevtiń aıtýynsha, oqıǵa saǵat 11.05-11.25 aralyǵyndaǵy úlken úzilis kezinde oryn aldy.
Ǵımarattyń úshinshi qabatynan gazdyń ıisi sezilip, oqıǵa ornyna ishki ister, TJ qyzmetkerleri, jedel járdem shaqyryldy.
Mektepten birinshi aýysymda oqıtyn balalar men muǵalimder, shamamen 300-deı adam shyǵaryldy.
«Jedel járdem alyp ketken úsh oqýshynyń qasynda muǵalimi bar. Olardan taldaý synamalary alynyp, tıisti qyzmet kórsetilýde», - dedi M.Ǵalıev.
Oral qalalyq bilim berý bóliminiń basshysy Jansulý Tóremuratova qazirgi kezde jaǵdaıdyń qalypqa túskenin, ekinshi aýysymdaǵy oqýshylardyń bilim alyp jatqanyn jetkizdi. Oqys oqıǵanyń neden bolǵanyn polıtsııa anyqtaıtyn bolady.
Oblystyq densaýlyq saqtaý basqarmasynyń baspasóz hatshysy Aınagúl Saqposynova jedel járdemge júgingenderge qatysty naqty aqparattyń keıin beriletinin aıtty.
