Oralda mektepte tútin ısi taralýyna baılanysty sabaq onlaınǵa aýystyryldy

ORAL. KAZINFORM — Oral qalasynda Álııa Moldaǵulova atyndaǵy № 38 mektep-lıtseıinde janý oqıǵasy tirkeldi.

Oral qalasy bilim berý bóliminen málim etkenindeı, oqıǵa 17 mamyr kúni boldy.

Atalmysh bilim ordasynda krandardy jóndeý jumystary júrgizilgen. Jóndeý jumystary memlekettik satyp alý aıasynda júzege asyrylyp, «Aqmaral» jeke kásipkerligi merdiger retinde tartyldy. Dánekerleý jumystary saǵat 21.00 shamasynda aıaqtalǵan.

Alaıda merdiger tarapynan órt qaýipsizdigi tehnıkasynyń tıisti deńgeıde saqtalmaýy saldarynan dánekerleý kezinde paıda bolǵan ushqyndar jertóledegi janǵysh zattarǵa túsip, bul túngi saǵat 00.00 shamasynda janý oqıǵasyna soqtyrdy. 

— Oqıǵa saldarynan ǵımarat ishinde tútin ıisi taralýyna baılanysty oqýshylar men qyzmetkerlerdiń qaýipsizdigi úshin 19 mamyr, dúısenbi kúngi oqý protsesin ýaqytsha onlaın formatqa aýystyrý týraly sheshim qabyldandy. Merdigerge qatysty ákimshilik hattama toltyrylyp, aıyppul salyndy, — dep habarlady vedomstvodan.

BQO TJ departamenti baspasóz qyzmetiniń naqtylaýynsha, habar 18 mamyrdaǵy saǵat 00.19-da túsip, órt sóndirýshiler 00.27-de jetken. Mekteptiń jertólesinde 10 sharshy metr aýmaqta matras janǵan. Zardap shekkender joq. Órt saǵat 00.48-de oqshaýlanyp, 00.50-de sóndirildi.

Eske sala keteıik, budan buryn soǵys jyldary Oralda mektep áskerı gospıtalǵa aınalǵanyn jazǵan edik.