Oralda mektep janynda «KamAZ» ben jeńil kólik soqtyǵysty
ORAL. QazAqparat – Oralda «KamAZ» ben jeńil kólik soqtyǵysyp, bir adam aýyr jaraqat aldy, dep habarlaıdy QazAqparat tilshisi.
Oqıǵa búgin Zachagan kentinde «Sarytaý» shaǵynaýdanyndaǵy mektep mańynda boldy.
Oblystyq polıtsııa departamenti baspasóz qyzmetiniń aldyn ala málimetine qaraǵanda, «KamAZ» basty jolda kele jatqan. Sol kezde «Nıva» avtokóligi shyǵyp qalyp, túıisken. Oqıǵa saldarynan jeńil kólik júrgizýshisi aýyr jaraqat aldy. Eki avtokólikte de júrgizýshiden basqa adam bolmaǵan.
Jedel járdem brıgadasy bes mınýttan keıin jetken.
BQO densaýlyq saqtaý basqarmasynyń baspasóz qyzmetinen málim etkenindeı, «Nıvanyń» 29 jastaǵy júrgýzishisi jabyq bas-mı jaraqatyn aldy, mıy shaıqalǵan. Oń jaǵyndaǵy bes-alty qabyrǵasy synǵan. Júrgizýshi oblystyq kópbeıindi aýrýhananyń hırýrgııalyq bólimshesine jetkizildi.
«Oblystyq aýrýhanada júrgizýshige jasalǵan tomografııa onyń oń jaqtaǵy jeti qabyrǵasynyń synǵanyn, mıy shaıqalyp, jabyq bas-mı jaraqatyn alǵanyn kórsetti. Qazirgi kezde aýyr halde jansaqtaý bóliminde jatyr. Tekserý jalǵasýda», dep habarlady oblystyq densaýlyq saqtaý basqarmasynyń baspasóz qyzmeti.
Qazirgi kezde oqıǵanyń mán-jaıy anyqtalyp jatyr.
Eske sala keteıik, budan buryn BQO dárigerleri Inder-Oral trassasyndaǵy jol apatynan zardap shekkenderdiń jaǵdaıy týraly aıtqan bolatyn.
