Oralda mektep órtenip, gazdan ýlanǵan kúzetshi aýrýhanaǵa tústi

ORAL. QazAqparat – Oralda mekteptegi órt kezinde gazdan ýlanǵan kúzetshi aýrýhanaǵa tústi, dep habarlaıdy QazAqparat tilshisi.

BQO polıtsııa departamentiniń baspasóz qyzmetinen málim etkendeı, oqıǵa 31 qańtarǵa qaraǵan túni D.Qonaev shaǵynaýdanynda bolǵan.

«Saǵat 00.05-te TJ departamentinen №28 mekteptiń ekinshi qabaty tútindep jatqany jóninde habar túsken. Polıtsııa qyzmetkerleri kelgen kezde synyptaǵy elektr qalqannyń tuıyqtalǵany anyqtaldy. Órtti sóndirmek bolǵan atalǵan mekteptiń kúzetshisi gazdan ýlanǵan. Keıin ol qalalyq aýrýhanaǵa jetkizildi. Kúzetshi gazdan ýlanǵan degen dıagnozben jansaqtaý bóliminde jatyr», dep habarlady vedomstvodan.

BQO TJ departamenti baspasóz qyzmetiniń naqtylaýynsha, 30 qańtar kúni saǵat 23.59-da 1992 jyly salynǵan №28 mektep-lıtseıdiń ekinshi qabatyndaǵy №45 oqý kabınetinde jıhaz jandy.

Órt aýmaǵy 15 sharshy metrdi qamtydy. Órt ornynan №48 oqý kabıneti aldynan mektepte kúzetshi bolyp jumys isteıtin 1957 jylǵy er adam tabyldy.

Oǵan alǵashqy kómek kórsetilip, qalalyq kópbeıindi aýrýhananyń jansaqtaý bólimine jatqyzyldy.

Gazdan ýlanǵan kúzetshiniń jaǵdaıy aýyr. Órt saǵat 00.37-de oqshaýlanyp, 00.40-ta tolyqtaı sóndirildi.

Eske sala keteıik, budan buryn Oralda syrǵanaq teýip júrgen 17 jasar qyzdyń aýyr jaraqat alǵanyn jazǵan bolatynbyz.

Foto: BQO TJ departamenti