Oralda mektep mańynda ıt órip júr: vetstantsııa ne istep jatyr

ORAL. KAZINFORM – Áleýmettik jelide Oral qalasyndaǵy № 47 orta mektep mańynda ıtterdiń órip júrgeni týraly beınejazba jarııalandy.

Osyǵan baılanysty ata-analar balalardy ózdiginen sabaqqa jiberýge, dúkenge jumsaýǵa qorqatyny jóninde pikirlerin bildirdi.

BQO veterınarııa basqarmasynan málim etkenindeı, Facebook áleýmettik jelisinde 24 qańtar kúni jarııalanǵan beınematerıaldar boıynsha Oral qalalyq veterınarııalyq stantsııasyna tapsyrma berilgen.

Veterınarııalyq stantsııanyń aýlaý brıgadasymen Zachagan kentindegi M.Móńkeuly kóshesinen 6 qańǵybas ıt aýlanyp, jansyzdandyrylǵan.

Qańǵybas ıtterdi aýlaý jumystary jalǵasýda.

Basqarmanyń naqtylaǵanyndaı, 2022 jyldyń 2 naýryzynan bastap «Janýarlarǵa jaýapkershilikpen qaraý týraly» QR Zańy qoldanysqa engizildi. Zań talaptaryna sáıkes qańǵybas ıtter men mysyqtardyń sany sterılızatsııalaý arqyly retteledi, jansyzdandyrý arqyly retteýge tyıym salynǵan. Jeke jáne zańdy tulǵalardyń ótinishi negizinde adamnyń ómirine nemese densaýlyǵyna, ózge janýarlarǵa qaýip tóndirgen kezde ǵana qańǵybas janýarlardy jansyzdandyrýǵa jol beriledi.

- Qańǵybas ıt-mysyqtar adamnyń nemese janýardyń ómiri men saýlyǵyna, sondaı-aq qoǵamdyq tártip pen qaýipsizdikke naqty qater tóndirgen jaǵdaıda turǵyndar bul týraly, múmkindigine qaraı foto-vıdeo dáleldemelerin qosa otyryp, 109 IKOMEK ortalyǵyna ótinish bere alady, - dep habarlady vedomstvodan.

Eske sala keteıik, budan buryn Oral qalasy turǵynynyń qoıyn ıtter taǵy da qyryp ketkenin jazǵan bolatynbyz.

Sondaı-aq BQO aýylynda qańǵybas ıtter qoılar men úı qustaryn qyryp ketken.

BQO-da qańǵybas ıtter kóp: máseleni sheshýdiń joldary qandaı ekendigi jazyldy.