Oralda mektep dırektorynyń attestat toltyrý úshin ata-analardan aqsha jınaǵany anyqtaldy
BQO sybaılas jemqorlyqqa qarsy is-qımyl departamentiniń baspasóz qyzmetinen málim etkenindeı, dırektordyń baspa qurylǵylarynyń mektepti bitirgeni týraly attestattardy toltyrý úshin aqsha jınaý deregi boıynsha atalǵan mekemege ata-analar júgingen.
«Osy aqparattyń durystyǵyn tekserý úshin 20 maýsymda «ANTIKOR Ortalygy» servıstik ortalyǵynda quzyretti organdar ókilderiniń qatysýymen kezdesý ótti. Tekseris qorytyndysynda tapsyrys berýshi – bilim berý uıymy men ónim berýshi – JShS-men arada 19 mamyrda mektepti bitirgeni týraly attestattardy toltyrý boıynsha qyzmetterdi memlekettik satyp alý týraly shart jasalǵany anyqtaldy. Memlekettik satyp alýdy ótkizý barysynda tapsyrys berýshi tehnıkalyq erekshelikte QR Bilim jáne ǵylym mınıstrliginiń 2007 jylǵy 21 qarashadaǵy «Bilim týraly memlekettik úlgidegi qujattardy toltyrýǵa qoıylatyn talaptardy bekitý týraly» №565 buıryǵynyń talaptaryn saqtamaǵan, ıaǵnı baspa qurylǵylarynyń kómegimen attestattardy toltyrý kórsetilmegen. Osyǵan baılanysty mektep dırektory eger ata-analar elektrondy túrde toltyrylǵan attestat alǵysy kelgen jaǵdaıda olardan 1000 teńgeden aqsha jınaý týraly nusqaý bergen. BQO boıynsha sybaılas jemqorlyqqa qarsy qyzmettiń aralasýynan keıin túlekterdiń ata-analarynan jınalǵan aqshalaı qarajat qaıtaryldy, atalǵan buzýshylyqqa jol bergeni úshin kináli tulǵalar tártiptik jaýapkershilikke tartyldy», dep habarlady vedomstvodan.
Eske sala keteıik, budan buryn BQO-da áskerı bıletti zańsyz bergen qorǵanys bóliminiń qyzmetkeri qamaýǵa alynǵanyn jazǵan bolatynbyz.
