Oralda medıtsınalyq qyzmet ýaqtyly kórsetilmegen: Marqumnyń otbasyna 4 mln teńge óndirildi
ORAL. KAZINFORM — Oral qalasynyń 58 jastaǵy turǵyny aýrýhananyń jansaqtaý bóliminde kóz jumǵan.
QR Joǵarǵy sotynyń málimetine qaraǵanda, marqumnyń uly polıtsııaǵa júgingen, biraq qylmystyq quqyq buzýshylyq quramynyń bolmaýyna baılanysty sotqa deıingi tergeý toqtatylǵan.
Degenmen Densaýlyq saqtaý mınıstrligi Medıtsınalyq jáne farmatsevtıkalyq baqylaý komıtetiniń departamenti júrgizgen tekserý emdelýshige medıtsınalyq kómek kórsetý kezinde buzýshylyqtardy anyqtady.
Medıtsına qyzmetkerleriniń áreketsizdigi ákesiniń ólimine ákep soqtyrǵan dep eseptegen uly aýrýhanadan jáne emdeýshi dárigerden moraldyq zııannyń ornyn toltyrý týraly sotqa talap aryz bergen.
Oral qalasynyń № 2 soty isti qarap, emdelýshiniń birneshe ret medıtsınalyq kómekke júgingenin anyqtady. Biraq medıtsına qyzmetkerleri ony mas kúıinde bolǵan degen jeleýmen qajetti tekserý júrgizýden bas tartqan. Bul rette aǵzadaǵy alkogol quramyna zertteý júrgizilmegen.
Densaýlyq saqtaý basqarmasynyń call-ortalyǵyna júgingennen keıin ǵana emdelýshige ıshemııalyq ınsýlt dıagnozy qoıylyp, terapııa bólimine jatqyzylǵan.
Bastalǵan emge qaramastan, emdelýshi kelesi kúni qaıtys bolǵan.
Aýrýhana ókili talap qoıýdy moıyndamady.
Prokýror talap qoıýdy ishinara qanaǵattandyrý týraly qorytyndy berdi.
Belgilengen mán-jaılar men is boıynsha usynylǵan dáleldemelerdi eskere otyryp, sot medıtsınalyq kómektiń ýaqtyly kórsetilmeýi emdelýshiniń qazasyn aldyn alýdyń naqty múmkindigin joǵaltýǵa ákeldi degen qorytyndyǵa keldi.
— Sot sheshim shyǵarǵan kezde málimdelgen talaptardy ishinara qanaǵattandyrdy jáne moraldyq zııandy óteý retinde talap qoıýshynyń paıdasyna aýrýhanadan 4 mln teńge óndirdi. Sot sheshimi zańdy kúshine endi, — dep habarlady vedomstvodan.
Eske sala keteıik, budan buryn BQO aýrýhanasy sapasyz qyzmet úshin marqumnyń otbasyna ótemaqy tóleıtin bolǵanyn jazǵan edik.
