Oralda medıtsına qyzmetkerine kúsh qoldanǵan: Turǵynǵa qatysty qylmystyq is qozǵaldy

ORAL. KAZINFORM — Oral qalasynda turǵynnyń medıtsına qyzmetkerine kúsh qoldanǵany jóninde áleýmettik jelide beınejazba jarııalandy.

Beınejazbada kórinip turǵanyndaı, er adam men medıtsına qyzmetkeri arasynda janjal týyndaǵan. Saldarynan quqyq buzýshy medıtsına qyzmetkerin birneshe ret ıterip jibergen. Budan keıin aýrýhana qyzmetkerleri arasha túsken.

Oqıǵa qalalyq kópbeıindi aýrýhanada qańtardyń 10-ynan 11-ine qaraǵan túni bolǵan.
BQO polıtsııa departamentiniń baspasóz qyzmetinen málim etkenindeı, Oral qalasyndaǵy medıtsına mekemesiniń qyzmetkerlerinen er adamnyń zańsyz áreketteri týraly habarlama túsken.

— Oqıǵa ornyna jedel túrde polıtsııa narıadtary jiberildi. Atalǵan azamat ustalyp, polıtsııa bólimine jetkizildi. Buzaqylyq deregi boıynsha qylmystyq is qozǵaldy. Qazirgi kezde oqıǵanyń mán-jaıy anyqtalyp jatyr. Polıtsııa qyzmettik mindetterin atqarý kezinde medıtsına qyzmetkerlerine kúsh qoldanǵany úshin qylmystyq jaýapkershilik kózdelgenin eskertedi, — dep habarlady vedomstvodan.

Eske sala keteıik, budan buryn Batys Qazaqstanda 130 jasóspirimniń polıtsııaǵa jetkizilgenin jazǵan edik.