Oralda medıtsına qyzmetkeri koronavırýsty juqtyrǵan
ORAL. QazAqparat – Oralda koronavırýsty juqtyrǵan toǵyzynshy naýqas medıtsına qyzmetkeri bolyp shyqty. Bul týraly brıfıngte BQO taýarlar men kórsetiletin qyzmetter sapasy men qaýipsizdigin baqylaý departamentiniń basshysy Muhamǵalı Aryspaev málim etti, dep habarlaıdy QazAqparat tilshisi.
Onyń aıtýynsha, 49 jastaǵy medbıke «Kýmyska» provızorlyq statsıonarynda jumys isteıdi.
Koronavırýsqa shaldyqqan adamdarmen baılanysta bolǵannan keıin medbıkeden bastapqyda 9 sáýir kúni alynǵan zerthanalyq synama teris nátıje kórsetken. Alaıda 12 sáýir kúni taǵy da synama alynǵan kezde onyń koronavırýspen aýyrǵany anyqtalyp, naýqas oblystyq juqpaly aýrýlar aýrýhanasyna jeke boksqa jatqyzyldy.
Jaǵdaıy qanaǵattanarlyq, em qabyldaýda.
Naýqaspen jumys ornynda tikeleı qarym-qatynasta bolǵan 7 adamnan synama alyndy. Onyń altaýynan aýrý anyqtalǵan joq. Bireýiniń qorytyndysy áli shyqqan joq.
Sonymen medıtsına qyzmetkeri turǵan «Qurylysshy» shaǵynaýdanyndaǵy úıdiń kireberisine karantın qoıylyp, naýqastyń páteri men sol mańǵa tıisti dezınfektsııa jumystary júrgizildi.
«Oǵan qosa «Kýmyska» statsıonarynda karantın ornatylyp, ondaǵy barlyq emdelýshilerdiń kirip-shyǵýyna tyıym salyndy. Naýqaspen baılanysta bolǵan jeti adam da karantınde. Basqa aýysymda bolǵan qyzmetkerler de tekserilip jatyr», dedi M.Aryspaev.
Onyń sózine qaraǵanda, boljam boıynsha atalǵan medıtsına qyzmetkeri qorǵanys quraldaryn durys paıdalanbaǵan. Munyń bári anyqtalý ústinde.
Oblystyq densaýlyq saqtaý basqarmasynyń basshysy Bolatbek Kaıýpov naýqastarmen aldyńǵy shepte jumys istep júrgen medıtsına qyzmetkerlerimen qosymsha nusqaý sharasy júrgizilgenin, turǵyndardyń da saqtyqty umytpaýy kerektigin jetkizdi.
Eske sala keteıik, buǵan deıin 49 jastaǵy vırýs juqtyrǵan naýqas, provızorlyq statsıonarda medbıke bolyp jumys isteıtini týraly www.coronavirus2020.kz saıtynyń resmı telegram arnasynda habarlanǵan bolatyn.
