Oralda maıdangerler men tyl eńbekkerlerine qurmet kórsetildi
Óńir basshysy ardagerlerge Elbasy Nursultan Nazarbaevtyń quttyqtaýyn jetkizip, Uly Jeńistiń ońaılyqpen kelmegenin atap kórsetti.
«Biz sizderdiń erlikterińizdi árqashan esten shyǵarmaı, baǵalap, úlgi tuta beretin bolamyz. Bárińizdiń Jeńistiń 75 jyldyq toıyna aman jetýlerińizge tilekshimiz. Budan buryn Oralda qazaqtyń úsh batyr qyzy Mánshúk Mámetova, Álııa Moldaǵulova jáne Hıýaz Dospanovaǵa eskertkish ornatylǵany belgili. Endi bıyl Astananyń 20 jyldyǵyna oraı elorda tórinde Mánshúktiń eskertkishi boı kótermekshi. Batyrlarymyzǵa degen mundaı qurmet bolashaqta da jalǵasa beretin bolady», dedi Altaı Kólginov.
Qazirgi tańda oblysta 108 maıdanger qalsa, sonyń 81-i Oralda turady. Olardy qurmetteý baǵytynda memlekettik organdar, jastar qoǵamdyq birlestikteri men kásipkerler tarapynan túrli sharalar jyl boıy uıymdastyrylýda. Bıyl maıdangerler bir jolǵy járdemaqyny ótken jylǵydan eki ese derlik kóp aldy. Bul kómek-qoldaý kólemi jyl saıyn óse túsetin bolady.
Soǵys jáne eńbek ardageri, M.Mámetova atyndaǵy memorıaldyq mýzeı janyndaǵy «Frontovıchka» klýbynyń jetekshisi Alevtına Mıtrohına beıbitshilik pen yntymaqqa eshteńe jetpeıtinin, osy oraıda Qazaqstan ózge elderge úlgi bolyp kele jatqanyn jetkizdi. Basqa da maıdangerler joryq joldary týraly estelikterimen bólisti.
Barlyq ardagerlerge eskertkish syılyqtar men gúl shoqtary tabys etilip, kezdesý sońynda kontsert qoıyldy.
Oblys pen qala basshylary búgin sondaı-aq qalalyq kópbeıindi aýrýhanada jatqan maıdanger Muǵalim Abaqovty jáne dárigerlerdiń nusqaýymen jarty jyldan beri úıinde em alyp júrgen tarıhshy-ǵalym Pavel Býkatkındi Jeńis meıramymen quttyqtady.
