Oralda «Matematıkalyq regata» jeńimpazdary anyqtaldy
ORAL. QazAqparat - Oralda respýblıkalyq «Matematıkalyq regata» olımpıadasynyń jeńimpaz-júldegerleri anyqtaldy, dep habarlaıdy QazAqparat tilshisi.
QR Bilim jáne ǵylym mınıstrligi men BQO bilim basqarmasy birlesip uıymdastyrǵan, matematıka páni muǵalimderi arasynda respýblıkalyq deńgeıde alǵash ret ótken bilim saıysyna barlyq oblystar men Astana, Almaty qalalarynan 18 komanda qatysyp, baq synady. Ár komanda quramynda tórt ustazdan boldy.
Sharanyń jabylý rásimine qatysqan oblys ákiminiń orynbasary Ǵabıdolla Ospanqulov respýblıkalyq matematıkalyq regata ótkizý ıdeıasy Jaıyq óńirinen bastaý alyp, mınıstrlik tarapynan qoldaý tapqanyn jetkizdi.
«Memleket basshysy elimiz táýelsizdik alǵannan beri bilim salasyn damytýǵa basa mán berip keledi. Óıtkeni qaı eldiń de ekonomıkalyq damýy sapaly adam kapıtalyna baılanysty. Bul rette bilim qashanda birinshi orynda turady. Osy oraıda memleketimiz bilim salasynan qarjy aıaǵan emes. Buǵan oblys bıýdjetiniń 46 paıyzy bilim salasyna jumsalyp otyrǵany dálel bola alady. Osy oraıda Asan Taımanovtaı akademık túlep ushqan topyraqta matematıka páni muǵalimderiniń aıtýly dodasy ótýi de zańdylyq», - dedi Ǵ.Ospanqulov.
QR Bilim jáne ǵylym mınıstrligi «Daryn» respýblıkalyq ǵylymı-praktıkalyq ortalyǵy pedagogıkalyq ınnovatsııalyq zerthanasynyń basshysy Aıgúl Karkýlova olımpıadanyń joǵary deńgeıde ótkendigin aıtyp, bilim berý salasyna súbeli úlesin qosyp júrgen adamdarǵa ortalyqtyń qurmet gramotasyn tabys etti.
Saıys qorytyndysynda Batys Qazaqstan jáne Aqtóbe oblysynyń komandalary birinshi dárejeli dıplommen marapattaldy. Almaty qalasynyń respýblıkalyq fızıka-matematıka mektebi, Jambyl, Atyraý oblysynyń ókilderi ekinshi, Shyǵys Qazaqstan men Pavlodardyń matematıkteri úshinshi orynǵa ıe boldy. Oǵan qosa Astana qalasynyń fızıka-matematıka mektebi, Qaraǵandy, Mańǵystaý oblystarynyń komandalary «Bilimge qushtarlyq» atalymyn enshiledi.
