Oralda «Master» dúkeni órtendi
ORAL. QazAqparat – Oral qalasynda bos turǵan «Master» qurylys materıaldary dúkeni órtendi, dep habarlaıdy QazAqparat tilshisi.
BQO TJ departamenti zilzalalardyń qaýip-qaterin azaıtý jáne azamattyq qorǵaý salasyndaǵy baqylaý basqarmasynyń bastyǵy Erlan Tóregeldıevtiń aıtýynsha, oqıǵa 7 sáýir kúni Qurmanǵazy kóshesi 112/2-mekenjaıynda oryn aldy.
Qala ortalyǵynda ornalasqan, jumys jasamaı turǵan dúkenniń tóbesi jandy.
Órt aýmaǵy 50 sharshy metrdi qamtydy.
«Tilsiz jaý» órt sóndirýshilerdiń kúshimen (13 adam, 2 tehnıka) saǵat 14.01-de aýyzdyqtaldy.
Zardap shekkender joq.
«Ǵımaratta órt qaýipsizdigi erejelerin saqtaýdyń mańyzy zor. Sonyń ishinde tóbege shyǵatyn, jertólege túsetin esikter qulyptaýly bolýy tıis», dedi QazAqparat tilshisine E.Tóregeldıev.
Eske sala keteıik, budan buryn Oralda bos turǵan ǵımarattyń órtengenin jazǵan bolatynbyz.
