Oralda mas júrgizýshi kóligimen qaǵyp ketken áıel jansaqtaý bólimine tústi

ORAL. QazAqparat – Oralda mas júrgizýshi kóligimen qaǵyp ketken 46 jastaǵy áıel jansaqtaý bóliminde jatyr, dep habarlaıdy QazAqparat tilshisi.

BQO polıtsııa departamentiniń baspasóz qyzmetinen málim etkendeı, oqıǵa 13 maýsym kúni tańǵy saǵat 07.00 shamasynda Ábilqaıyr han dańǵyly boıynda bolǵan.

«Jıgýlı» aıaldamasy tusynda 1975 jylǵy júrgizýshi jaıaý júrginshi ótkelinen ótip bara jatqan áıeldi qaǵyp ketken. Jol apaty saldarynan túrli dene jaraqattaryn alǵan 1976 jylǵy áıel aýrýhanaǵa jetkizildi. Medıtsınalyq kýálandyrý júrgizýshiniń jeńil dárejede mas kúıinde bolǵandyǵyn kórsetti. Qazirgi kezde avtokólik arnaıy turaqqa qoıyldy. QR QK 345-babyna sáıkes sotqa deıingi tergeý amaldary júrgizilýde», dep habarlady vedomstvodan.

BQO densaýlyq saqtaý basqarmasy baspasóz qyzmetiniń naqtylaýynsha, qalalyq kópbeıindi aýrýhananyń jansaqtaý bólimine jatqyzylǵan áıeldiń jaǵdaıy aýyr.

Aıaǵy, qabyrǵalary synǵan, keýdesinen qatty soqqy alǵan.

Eske sala keteıik, budan buryn Oralda avtobýs pen jeńil kólik soqtyǵysyp, 18 jastaǵy júrgizýshiniń qaza tapqanyn jazǵan bolatynbyz.