Oralda mas kúıinde jol apatyn jasaǵan polıtsııa qyzmetkeriniń isi sotta qaraldy
ORAL. QazAqparat – Oral qalasynyń mamandandyrylǵan ákimshilik soty Abaı polıtsııa bólimi jergilikti polıtsııa qyzmeti bóliminiń bastyǵyna qatysty ákimshilik quqyqbuzýshylyq týraly isti qarady, dep habarlaıdy QazAqparat tilshisi.
BQO sotynyń baspasóz qyzmeti málim etkenindeı, atalǵan polıtsııa qyzmetkeri 13 maýsymda túngi saǵat 03.00 shamasynda «Folksvagen Passat» avtokóligin aıdap kele jatyp, «Aýdı A4» kóligimen soqtyǵysýǵa jol bergen.
Anyqtalǵanyndaı, ol kólikti mas kúıde júrgizgen. Polıtsııa qyzmetkeri óz kinásin sotta moıyndady.
QR Ákimshilik quqyqbuzýshylyq kodeksi 608-baby 3-bóligine sáıkes kólik quraldaryn búldirýge ákep soqqan júrgizýshiniń mas kúıinde avtokólik aıdaýy 20 táýlikke ákimshilik qamaqqa alýǵa jáne 7 jyl merzimge kólik quralyn júrgizý quqyǵynan aıyrýǵa jazalanady. Alaıda polıtsııa qyzmetkeri qamaýǵa alýdan bosatyldy. Óıtkeni bul sharany Ákimshilik quqyqbuzýshylyq kodeksi 32-baby 2-bóligine sáıkes quqyq qorǵaý organdarynyń qyzmetkerlerine qoldanýǵa bolmaıdy.
Degenmen polıtsııa qyzmetkerine tártiptik jaza tónip tur. Іs materıaldary sheshim qabyldaý úshin Batys Qazaqstan oblysynyń polıtsııa departamentine joldandy.
Ákimshilik quqyq buzýshylyq týraly is 21 maýsymda sot óndirisine kelip tústi jáne sol kúni qaraldy.
Qaýly zańdy kúshine engen joq.
Eske sala keteıik, budan buryn Oralda polıtsııa qyzmetkeriniń mas kúıinde jol apatyna ushyraǵanyn jazǵan bolatynbyz.
