Oralda mas kúıde avtokólik basqarǵan júrgizýshi qamaýǵa alyndy

ORAL. KAZINFORM — Oral qalalyq polıtsııa basqarmasy patrýldik polıtsııa batalonynyń qyzmetkerleri 40 jastaǵy er adam júrgizip kele jatqan «Mazda» avtokóligin toqtatyp, onyń buǵan deıin kólik júrgizý quqyǵynan aıyrylǵanyn anyqtady. Bul týraly BQO polıtsııa departamenti habarlady.

Oblystyq polıtsııa departamentiniń baspasóz qyzmetinen málim etkenindeı, tekserý barysynda atalǵan turǵynnyń bıylǵy shilde aıynda kólik quralyn alkogoldik masań kúıde basqarǵany úshin júrgizýshi quqyǵynan aıyrylǵany belgili boldy. Ol balasyn mektepten alýǵa bara jatqanyn aıtqan.

— Medıtsınalyq kýálandyrý nátıjesinde júrgizýshiniń esirtkige mas kúıde bolǵany anyqtaldy. Er adam ýaqytsha ustaý ızolıatoryna qamaldy, al avtokólik arnaıy turaqqa jiberildi. Atalǵan derek boıynsha qylmystyq is qozǵaldy. Júrgizýshige bas bostandyǵyn shekteý nemese bes jylǵa deıin bas bostandyǵynan aıyrý qaýpi tónip tur. Oǵan qosa belgili bir laýazymdardy atqarý nemese belgili bir qyzmetpen aınalysý quqyǵynan ómir boıyna aıyrylýy múmkin, — dep habarlady vedomstvodan.

Departament málimetine sáıkes, óńirde jol-kólik oqıǵalaryn azaıtý jáne jol qozǵalysy erejelerin buzýdyń aldyn alý maqsatynda 1-7 jeltoqsan aralyǵynda ótkizilip jatqan «Qaýipti júrgizýshi» respýblıkalyq jedel aldyn alý is-sharasynyń alǵashqy kúninde mas kúıdegi eki júrgizýshi ustaldy.

Eske sala keteıik, budan buryn Oralda ınternet-dúken kýreri esirtkimen ustalǵanyn jazǵan bolatynbyz.