Oralda «Mánshúk» dramasynyń premerasy boldy
ORAL. QazAqparat - H.Bókeeva atyndaǵy oblystyq qazaq drama teatrynda jazýshy-dramatýrg, Memlekettik syılyqtyń ıegeri Sábıt Dosanovtyń shyǵarmasy boıynsha «Mánshúk» dramasynyń premerasy boldy, dep habarlaıdy QazAqparat tilshisi.
Keńes Odaǵynyń Batyry Mánshúk Mámetovanyń jastaı jalyn keshken, qamshynyń sabyndaı qysqa ǵumyryna arnalǵan spektakldi Qazaqstannyń eńbek sińirgen qaıratkeri Ashat Maemırov pen Álııa Baımahan sahnalasa, sýretshileri - mádenıet salasynyń úzdigi Qaıyr Orazǵalıev pen Murat Mámbetov. Qoıylymnyń barynsha sátti shyǵýyna sondaı-aq horeograf Qarlyǵash Qadyrbekova jáne basqa teatr mamandary atsalysty.
Tarıhı derekterge negizdelgen týyndyda Mánshúktiń rolinde Aıjan Qaıyrova men Áıgerim Saǵadenova oınaıdy. Olardyń biri batyr qyzdyń beıbit kúndegi oı-armanyn, kókeıindegi muńyn jetkizýge tyryssa, ekinshisi soǵys kórip, qataıǵan, jaýdan kek almaı, qaıtpaýǵa bekingen Mánshúktiń beınesin sahnaǵa shyǵardy. Sondaı-aq Mánshúktiń analary rolinde Qazaqstannyń eńbek sińirgen qaıratkeri Gúljııan Shyntemir, Qazaqstannyń eńbek sińirgen ártisi, «Daryn» memlekettik syılyǵynyń ıegeri Ásel Mámbetova, ákeleri retinde Aıdar Jarylǵapov pen Talıǵat Jigerov kórindi. Al Mánshúkti unatyp qalyp, sezimin bildirgen jaýynger Nurkenniń rolin Jylqybaı Jubatov somdady.
Premeraǵa arnaıy kelgen týyndy avtory Sábıt Dosanov shyǵarmany qoıǵany úshin Batys Qazaqstan oblystyq qazaq drama teatrynyń ujymyna rızashylyǵyn bildirdi.
Batys Qazaqstan oblysynyń ákimi Altaı Kólginov bul spektakldiń Jeńis kúnine oraı arnaıy qoıylǵanyn, búgingi jas urpaqty otanshyldyq rýhta tárbıeleýde mundaı týyndylardyń mán-mańyzy zor ekendigin jetkizdi. Qazaqtyń batyr qyzy jerlengen Nevel qalasynda bıylǵy Jeńis meıramyna BQO-dan arnaıy delegatsııa qatyssa, aldaǵy jazda Astananyń 20 jyldyǵyna oraı elordada Mánshúktiń eńseli eskertkishi ornatylmaqshy. Endi buǵan erlikti dáripteıtin jańa qoıylym qosylyp otyr.
Spektakldi qoıǵan rejısserlerdiń biri, M.Áýezov atyndaǵy Qazaq memlekettik akademııalyq drama teatrynyń dırektory Ashat Maemırov batysqazaqstandyq teatrdy bıyl kúzde Almatyǵa gastroldik saparmen kelip-ketýge shaqyrdy.
Aıta keteıik, 8-13 mamyr kúnderi Oralda M.Áýezov atyndaǵy teatrdyń gastroli ótedi.
