Oralda mádenıet qaıratkeri I.Gýdoshnıkovaǵa qurmet kórsetildi
ORAL. QazAqparat - Oral qalasynda óńirge tanymal ardager, Qazaqstannyń eńbek sińirgen mádenıet qyzmetkeri Inna Gýdoshnıkovanyń 80 jasqa tolýyna oraı qurmet kórsetildi.
Aldymen ardagerdi oblys ákiminiń orynbasary Baqtııar Máken qabyldap, óńirdegi mádenıet salasynyń damýy, óner qaıratkerleriniń jaı-kúıi týraly áńgimelesti.
Sodan keıin Ǵ.Qurmanǵalıev atyndaǵy oblystyq fılarmonııanyń kontsert zalynda I.Gýdoshnıkovanyń «Meniń jyldarym - meniń baılyǵym» atty mereıtoılyq keshi ótti. Onda oblys ártisteri óz ónerlerin kórsetip, sonyń ishinde mereıtoı ıesiniń jary, aqyn Vladıslav Irhınniń týyndylaryn oryndady.
Aıta keteıik, 1935 jylǵy 16 qańtarda Oral qalasynda dúnıege kelgen Inna Gýdoshnıkova qyryq jyldan astam ýaqyt boıy mádenıet salasynda qyzmet etti. Sonyń ishinde 1971-1997 jyldary oblystyq mádenıet basqarmasy basshysynyń orynbasary retinde salanyń órkendep, damýyna óz úlesin qosty. Ol «Eren eńbegi úshin» jáne basqa medaldarmen, qurmet gramotalarymen marapattalǵan.
